Xabaringiz bor, bundan ikki hafta oldin Respublika olimpiya zaxiralari sport kollejiga yangi rahbar tayinlangandi. ROZKning yangi direktori Mirsardor Alimov oldiga bir qator vazifalar belgilanib, ularni qisqa muddatda bartaraf etish vazifasi yuklatilgandi.
Bugun Milliy olimpiya qo‘mitasi Prezidenti Umid Ahmadjonov o‘zgarishlar bilan tanishish maqsadida kollejga tashrif buyurdi. MOQ rahbari u yerda sportchilar uchun yaratilgan sharoitlar, ularning ovqatlanish rasioni, yotoqxonasi, sport inshootlari, mashg‘ulotlar maydoni, maxsus otxona ahvolini ko‘zdan kechirdi. Yangi bino va inshootlarni loyihalash ishlari bo‘yicha kerakli ko‘rsatmalarni berdi.
“Respublika olimpiya zaxiralari kolleji o‘z nomiga monand yurtimiz sportiga bo‘lajak Olimpiya va Osiyo chempionlarini tarbiyalab berishi kerak. Bu maskanda faqatgina mamlakatimizning eng iqtidorli yoshlari tahsil olishlari, jismoniy va texnik imkoniyatlarini toblab borishlari lozim. Davlatimiz Olimpiya zaxiralari kollejlarining samarali ishlashi uchun milliardlab mablag‘ ajratmoqda. Shunday ekan, ushbu mablag‘larning maqsadli sarflanishini jiddiy nazoratga olish kerak.
Biz har bir jihatni e’tiborga olishimiz zarur. Talaba-sportchilarning ovqatlanish rasionidan tortib, mashg‘ulotlarda oladigan yuklamasiga qadar qat’iy nazoratda bo‘lishi kerak. Bu yerda bizning bo‘lajak chempionlar kamolga yetadi. Ularga barcha kerakli sharoitlarni yaratib berish yo‘lida Milliy olimpiya qo‘mitasi har qanday yordamga tayyor” – dedi Umid Ahmadjonov kollejdagi sharoitlar bilan tanishar ekan.
Tashrif davomida MOQ rahbari shuningdek kamondan o‘q otish sport turi bo‘yicha tahsil olayotgan yoshlar bilan suhbatlashdi, kamchilik hamda muammolari bilan qiziqdi va o‘sha yerning o‘zida imkoniyatlarini sinovdan o‘tkazib ko‘rdi.
Milliy olimpiya qo‘mitasi yuritayotgan siyosat, olib borayotgan islohotlarga ko‘ra yurtimizdagi Olimpiya zaxiralari kollejlari terma jamoalarimiz uchun asosiy baza sifatida xizmat qilishi kerak. Respublika olimpiya zaxiralari kolleji esa ular orasida chin ma’noda bayroqdor bo‘lishi lozim.