O‘zbekiston futbol assosiasiyasi va Professional futbol ligasi milliy chempionatimizda ishtirok etayotgan futbolchi va murabbiylarning nafaqat jismoniy jihatdan yetuk, balki ma’naviy jihatdan ham barkamol bo‘lishi uchun bir qator chora-tadbirlarni yo‘lga qo‘ygan.
Jumladan, O‘zbekiston milliy olimpiya qo‘mitasi prezidenti va O‘zbekiston futbol assosiasiyasi birinchi vise-prezidenti Umid Ahmadjonovning topshirig‘iga ko‘ra har oyning dushanba kunlari Superliga klublarida ma’naviyat va ma’rifat darslari bo‘lib o‘tmoqda.
Ushbu darslarda mamlakatimiz Prezidenti muhtaram Shavkat Mirziyoyev tomonidan yurtimizda sportni, xususan, futbolni rivojlantirish maqsadida qabul qilinayotgan qarorlar mazmuni futbolchi va murabbiylarga yetkazilmoqda.
Shuningdek, futbolchi va murabbiylarda Vatanga sadoqat, elu yurtga bo‘lgan hurmatni yanada oshirish, vatanparvarlik tuyg‘ularini shakllantirish maqsadida muqaddas tariximiz, ulug‘ bobokalonlarimiz, yurtimizdan chiqqan allomalar va ularning asarlari, milliy urf-odatlarimiz va qadriyatlarimiz haqida ma’ruzalar o‘qilmoqda.
Shuningdek, klublardagi yosh futbolchilar bilan birgalikda futbol faxriylari, yoshi ulug‘ insonlar ziyorat qilinmoqda. Ularning o‘tmish xotiralari, bosib o‘tgan yo‘llari, boy tajribalari yosh futbolchilarga ibrat sifatida ko‘rsatilmoqda.
Bu kabi ma’naviyat va ma’rifat darslari milliy chempionatimizda to‘p surayotgan futbolchilarga xalqaro maydonlarda Vatan sha’ni uchun maydonga tushayotganda qo‘shimcha ruhiy ozuqa taqdim qilishi aniq.
