Ma’lumki, jarohatlar futbolning bir qismi hisoblanadi. Futbol to‘qnashuvlarga boy  sport turi hisoblanib, so‘nggi paytlarda bu sport turida qo‘polliklar ko‘payib bormoqda.

FIFA tashkiloti futbolda jarohatlarni kamaytirish maqsadida har yili futbol qoidalariga o‘zgartirishlar kiritib bormoqda. Bundan tashqari, uchrashuv paytida to‘qnashuvlar ro‘y berganida jarohatlangan futbolchilarga tez tibbiy yordam ko‘rsatish bo‘yicha ham FIFA tashkiloti tegishli ko‘rsatmalar ishlab chiqib, terma jamoalar va klublar shifokorlarini ana shu ko‘rsatmalar asosida ish olib borishini jiddiy nazorat qilib bormoqda.

Shularni inobatga olgan holda, Osiyo futbol konfederasiyasi ham terma jamoalar va klublar shifokorlarining malakasini muntazam ravishda oshirib borish borasida turli seminarlar, o‘quv kurslari tashkil etyapti.

O‘zbekiston futbol assosiasiyasi ana shunday o‘quv kurslaridan birini Toshkent shahrida o‘tkazish bo‘yicha OFKga taklif bildirdi. O‘z o‘rnida OFK bu taklifni to‘la qo‘llab-quvvatlagan holda, Markaziy Osiyo terma jamoalari va klublari shifokorlari uchun shu yilning 9-12 oktyabr kunlari Toshkentda o‘quv kurslari o‘tkazadigan bo‘ldi.

Kurs davomida OFK tomonidan FIFAdan taklif qilingan mutaxassis terma jamoalar va klublari shifokorlari uchun maydonda futbolchilarga tez tibbiy yordam ko‘rsatish, ularni jarohatlardan asrash, jarohat olgan futbolchilarni tezroq safga qaytarish borasida amalga oshiriladigan chora-tadbirlar haqida ma’lumot berib o‘tadi.

Shuningdek, o‘quv kurslari davomida anti-doping masalalariga ham to‘xtalib o‘tiladi. Futbolchilarni davolash maqsadida ishlatiladigan dori vositalari, ularning qay birini amaliyotda qo‘llash ta’qiqlangani borasida tushuntirishlar berib o‘tadi.