O‘FA mutaxassislari tomonidan yurtimizning turli viloyatlarida OFK va O‘FAning murabbiylik lisenziyalariga ega mutaxassislarning kasbiy malakasini aniqlash bo‘yicha seminarlar tashkil qilinayotgani haqida avval xabar berib o‘tgandik.
Ana shunday seminarlar Farg‘ona va Qarshida davom etmoqda.Murabbiylarning nazariy bilimlari sinovdan o‘tgach, endi ulardan amaliy imtihonlar olinmoqda.
Amaliy imtihonlar davomida murabbiylarning mashg‘ulotlar olib borishga qanday tayyorgarlik ko‘rganliklari, maydonni mashg‘ulotga tayyorlash, mashg‘ulot davomida bolalarga ko‘rsatmalar berib borish usuli, murabbiyning mashg‘ulot davomida o‘zini tutishi, futbolchilarning mashg‘ulotdagi xatolarini ko‘rsatib borish va o‘sha xatoni to‘g‘irlash borasida amalga oshiradigan xatti-harakatlari sinovdan o‘tkazilyapti.
Shuningdek, barcha viloyatlarda futbolga ixtisoslashtirilgan maktab-internat o‘quvchilari ota-onalari bilan suhbatlar o‘tkazilmoqda. Suhbat davomida ota-onalarga futbol maktab-internatlari tarbiyalanuvchilarining yangi tashkil etiladigan akademiyalarga o‘tish mexanizmi tushuntirilmoqda. Unga ko‘ra dastlabki saralashdan o‘tgan maktab-internatlari tarbiyalanuvchilari akademiyalarga imtihon topshirish imkoniyatiga ega bo‘lishadi. Akademiyalarga qabul uchun alohida tashkil etilgan imtihondan o‘tganlar akademiya tarbiyalanuvchilariga aylanishadi.