Toshkent shahrida voleybol bo‘yicha erkaklar o‘rtasida XXVI O‘zbekiston milliy chempionatining yakuniy, to‘rtinchi turi nihoyasiga yetdi.

Mamlakat chempionatining bu yilgi mavsumida «O‘zbektelekom» (Samarqand), «So‘g‘diyona» (Navoiy), «Oriyent» (Toshkent), «Yoshlik» (Farg‘ona), OTMK (Olmaliq) jamoalari ishtirok etishdi.

To‘rtta turdan iborat bo‘lgan musobaqada poytaxtning «Oriyent» jamoasi 47 ochko to‘plagan holda mamlakat chempionligini qo‘lga kiritdi. Ikkinchi pog‘onadan esa OTMK jamoasi (34 ochko) joy oldi. Uchinchi o‘rin esa «So‘g‘diyona» (24 ochko) jamoasiga nasib qildi.

Musobaqa yakunlangach taqdirlash marosimi tashkil qilindi. Kuchli uchlikka kirgan jamoalar diplom, medal va esdalik sovg‘alari bilan taqdirlanishdi.