“Metallurg” futbol maktabi tashabbusi bilan «1 iyun – Xalqaro bolalarni himoya etish kuni”ga bag‘ishlangan turnir uyushtirildi. Unda 2007 – 2008 yillarda tug‘ilgan bolalar jamoalari ishtirok etishdi.

Musobaqada Sirdaryo viloyatining Yangiyer, Guliston, Boyovut, Shirin shaharlari hamda Toshkent viloyatining Bekobod tumani va Bekobod shahridan tashrif buyurgan jamoalar ishtirok etishdi.

Musobaqa davomidada 12 ta 2007 yilda tug‘ilgan bolalar jamoalari hamda 8 ta 2008 yilda tug‘ilganlar bolalar jamoalari o‘zaro g‘oliblik uchun bahs olib bordilar. Musobaqa avvalida jamoalar guruh o‘yinlarida omadlarini sinab ko‘rishdi va yarim finalchilar nomini aniqlab berishdi. Yarim final o‘yinlaridan boshlab turnir olimpiya tizimida o‘tkazildi.

2007 yilda tug‘ilganlar bahsida bosh sovrin uchun “Metallurg-1” – “Metallurg-2” jamoalari o‘zaro kuch sinashishdi. Unda birinchi jamoa 2:1 hisobida g‘alaba qozondi. Bronza medali uchun bahs Bekobod shahrining “Ayaks” va Bekobod tumanining “Dalvarzin” jamoalari o‘rtasida bo‘lib o‘tdi va unda shaharliklar 3:1 hisobida g‘alaba qozonishdi.

2008 yilda tug‘ilgan bolalar musobaqasi ikki guruhda tashkillashtirildi. Turnir g‘olibligini “Metallurg” futbol maktabining birinchi jamoasi qo‘lga kiritdi. Ular finalda “Metallurg-3” jamoasini 5:2 hisobida taslim etishdi. Uchinchi o‘rin uchun o‘yinda Bekobod tumanining “Zafar” hamda “Metallurg-2” jamoalari kuch sinashib, bekobodliklar 2:0 hisobida zafar quchishdi.

Musobaqa yakunida g‘olib va sovrindorlarga “Metallurg” PFK tomonidan kubok, medal va diplomlar hamda esdalik sovg‘alari topshirildi.