AQSHning Wake Forest tennis jamoasi NCAA chempionatida g‘olib bo‘lgani munosabati bilan prezident Donald Tramp bilan uchrashish uchun Oq uyga taklif qilindi.
Ushbu jamoa tarkibida o‘zbekistonlik Alan Gajiyev Oq uyda mehmon bo‘ldi. Bu haqda Winston-Salem Journal nashri xabar berdi.
AQSH rahbari talabalar sporti milliy uyushmasining nufuzli turnirida qozongan g‘alabasi bilan sportchilarni shaxsan tabriklashni xohlab shunday tashkilotchilikni amalga oshirgan.
Tramp 20 daqiqa davomida jamoaning har bir a’zosi bilan suhbatlashib, ularni muvaffaqiyat bilan tabrikladi va ular qozongan natija buyuk ekanligini e’tirof etdi.
Ma’lumot uchun, Wake Forest universiteti jamoasidagi yagona o‘zbekistonlik vakil – Alan Gajiyev 1996 yilda Toshkentda tug‘ilgan. 8 yoshdan beri tennis bilan shug‘ullanadi. 14 yoshida Barselonaga Sanchez-Casal akademiyasida tennis sirlarini o‘rganish uchun jo‘nab ketgandi.
Uning AQSHdagi jamoadoshlari orasida Xorvatiya, Kipr, Germaniya, Tunis, Isroil yoshlari ham o‘rin egallagan.