Butun dunyoda olimpiya harakatini boshqarish va o‘yinlarni tashkil etish  hamda o‘tkazish maqsadida 1894 yil 23 iyunda Fransiyaning Sarobonna universitetida fransuz pedagogi Pyer de Kuberten tashabbusi bilan kongress o‘tkazildi.

Kongressda Xalqaro olimpiya qo‘mitasi (XOQ) tashkil etildi. Shu kundan boshlab, 23 iyun – Xalqaro Olimpiya kuni deb e’lon qilindi. Bu kun bayram sifatida dunyoning 5ta qit’asida nishonlanib kelinmoqda.

Bugun Namangan Davlat Universitetida Xalqaro Olimpiya kuni munosabati bilan  2-an’anaviy respublika seminari o‘tkazildi. Unda viloyatimiz vakillari bilan birga poytaxtimiz Toshkent shahri, shuningdek, Farg‘ona va Andijon viloyatlaridan tashrif buyurgan faxriy mehmonlar ishtirok etishdi.

Seminar doirasida “Jismoniy madaniyat” fakulteti hovlisida mamlakatimiz sportchilarining va mazkur fakultet talabalarining Olimpiada o‘yinlarida erishgan yutuqlari aks etgan, shuningdek, ushbu fakultet talabalarining ijodiy, bundan tashqari, Namangan viloyat olimpiya zaxiralari kolleji talabalari tomonidan qo‘lga kiritilgan yutuq  hamda Namangan viloyatining bosh jamoasi - “Navbahor”ning zafarlariga oid ko‘rgazma tashkil etildi.

Ayni paytda “Jismoniy madaniyat” fakultetida “Navbahor” jamoasining 2 nafar a’zosi – himoyachi Jahongir Mehmonov va yarim himoyachi Azizbek Turg‘unboyev tahsil olishayotganligini ham qayd etish joiz.  

Ko‘rgazma ishtirokchilar va mehmonlarda yaxshi taassurot qoldirdi.

Xalqaro Olimpiya kuni munosabati bilan o‘tkazilgan  2-an’anaviy respublika seminari esa “Jismoniy madaniyat” fakultetining anjumanlar zalida davom ettirildi.