Sir emaski, so‘nggi paytlarda yosh o‘zbek shaxmatchilari o‘z muvaffaqiyatlari bilan jahon arenalarida butun dunyoni lol qoldirib kelishmoqda. Minskda o‘tkazilgan o‘smirlar o‘rtasidagi II jahon chempionatida muvaffaqiyat qozonib, shohsupaga ko‘tarilgan yosh hamyurtlarimiz o‘zbek shaxmatining qanday salohiyatga ega ekanligi, mamlakatimizda kuchli shaxmatchilarning yangi avlodi kamolga yetayotganidan darak berib turibdi.

Avval xabar berib o‘tganimizdek, o‘zbekistonlik yosh shaxmatchilar Belorus poytaxti Minsk shahrida bo‘lib o‘tgan shaxmatning blis va rapid yo‘nalishida o‘smirlar o‘rtasidagi jahon chempionatida 9 ta medal qo‘lga kiritib, umumjamoa hisobida birinchi o‘rinni egallagandilar.

Bugun ana shu nufuzli musobaqada muvaffaqiyatli ishtirok etgan yosh aql-idrok sohiblari poytaxtimizga yetib kelishdi. Shaxmatchilarimizni Islom Karimov nomidagi Toshkent xalqaro aeroportida Jasur Matchanov boshchiligidagi O‘zbekiston Milliy olimpiya qo‘mitasi mutasaddilari, mamlakat shaxmat federasiyasi xodimlari, sportchilarning ota-onalari hamda ommaviy axborot vositalari xodimlari kutib olishdi.

Eslatib o‘tamiz, o‘smirlar o‘rtasidagi II jahon chempionatida hamyurtlarimiz rapid yo‘nalishida 2 ta oltin (Humoyun Begmurotov, Umida Omonova), 2 ta kumush (Afro‘za Hamdamova, Olmos Rahmatullayev), blis bellashuvlarida esa 3 ta oltin (Humoyun Begmurotov, Afro‘za Hamdamova, Umida Omonova) hamda 2ta kumush (Ruqiya Olimova, Shahrombek Karimov) medallarini qo‘lga kiritishgandi.

«Musobaqa biz uchun juda yaxshi o‘tdi. U yerda turli mamlakat vakillariga qarshi o‘ynadim va ularni mag‘lubiyatga uchratib, oltin medalni qo‘lga kiritdim. Jahon chempioni bo‘lib, shohsupaga ko‘tarilganimdan juda xursandman. Shaxmatchilardan norvegiyalik Magnus Karlsenga havas qilaman, uning muxlisiman. Kelajakda dunyoning eng yosh grossmeysteri bo‘lmoqchiman, undan tashqari kattalar o‘rtasida jahon chempioni bo‘lishni orzu qilaman», – dedi rapid va blis yo‘nalishidagi jahon chempioni Humoyun Begmurotov.

«Jahon chempionati menga juda yoqdi. Raqiblarimning barchasini mag‘lubiyatga uchratib, jahon chempioni bo‘la oldim. Minsk juda chiroyli shahar ekan. Bellashuvlarda kuchli raqiblar ko‘p bo‘ldi, ammo biz ulardan kuchli ekanligimizni namoyish etib, umumjamoa hisobida birinchi o‘rinni qo‘lga kiritdik. Bundan juda xursandmiz. Endi Ispaniyada tashkil qilinadigan an’anaviy shaxmat bo‘yicha jahon chempionatida qatnashamiz, u yerdan ham chempion bo‘lib qaytmoqchimiz», – dedi jahon birinchiligi g‘olibi Afro‘za Hamdamova.

O‘zbekiston Milliy olimpiya qo‘mitasi ushbu muvaffaqiyat bilan O‘zbekiston shaxmat federasiyasi, terma jamoamiz murabbiylar shtabi, chempion sportchilarimiz va ularning ota-onalarini yana bir marotaba tabriklab qoladi.