Gandbol bo‘yicha O‘zbekiston yoshlar va o‘smirlar terma jamoasi a’zolari Qozog‘istondagi «IHF Trophy CUP» musobaqasining Markaziy Osiyo bosqichida ishtirok etishlari haqida xabar bergandik. Bir necha kun davom etgan bahslar yakuniga ko‘ra, o‘smirlarimiz (U-18) barcha raqiblari ustidan zafar quchib, musobaqa g‘olibiga aylanishdi.
Sportchilarimiz guruh bosqichida Tojikiston, Qirg‘iziston, Qozog‘iston, Turkmaniston terma jamoalarini mag‘lubiyatga uchratishdi. Hal qiluvchi final bosqichida mezbon – Qozog‘iston terma jamoasi a’zolarini 36:26 hisobida mag‘lub etib, turnir g‘olibiga aylanishdi. Ushbu g‘oliblik sportchilarimizga «IHF Trophy CUP» musobaqasining Osiyo bosqichida ishtirok etish huquqini taqdim etdi.
Turnirda qatnashgan U-19 terma jamoamiz ham guruhdagi barcha raqiblarini mag‘lubiyatga uchratib, final o‘yiniga yo‘l olgandi. Afsuski, hal qiluvchi bahsda terma jamoamiz mezbonlarga 25:27 hisobida imkoniyatni boy berdi.
