Xabaringiz bor, 30 iyun kuni O‘zbekistonda «Yoshlar kuni» sifatida nishonlanadi. Ushbu sana munosabati bilan Milliy olimpiya qo‘mitasi, O‘zbekiston Respublikasi Jismoniy tarbiya va sport vazirligi, viloyat jismoniy tarbiya va sport boshqarmalari tomonidan joylarda turli sport tadbirlari tashkil etilmoqda.
Jumladan, 27 iyun kuni Zomin tumanida yengil atletika bo‘yicha yugurish bahslari o‘tkazildi. Unda ishtirokchilar uzoq masofaga yugurish bo‘yicha turli yo‘nalishlarda o‘zaro bellashdilar.
Shuningdek, Qashqadaryo viloyatining Shahrisabz shahrida marafon musobaqasi bo‘lib o‘tdi.
Viloyatning Chiroqchi tumanida joylashgan BO‘SM, shuningdek, tumanning markaziy o‘yingohida voleybol, futbol va kurash bo‘yicha musobaqa nihoyasiga yetdi. Bahslar yakunida faol sportchilar tashkilotchilar tomonidan diplom, medal va esdalik sovg‘alari bilan taqdirlanishdi.
Qayd etish lozimki, bayramona kayfiyatda tashkil qilingan ushbu musobaqalar mamlakatimizning minglab yoshlarini birlashtira oldi. Qolaversa, ana shunday sport tadbirlari aholi, xususan yoshlar o‘rtasida sportni ommaviylashtirishda muhim o‘rin tutadi. Bu esa o‘z navbatida sport rivojiga hissa qo‘shib, murabbiylar uchun yangi nomlarni saralab olishda qo‘l keladi.
