Nigeriya terma jamoasi sardori Jon Obi Mikel guruh bosqichining so‘nggi turi oldidan jiddiy muammoga duch kelgani aniq bo‘ldi. Jamoa Argentinaga qarshi o‘yin uchun yo‘l olgan paytda futbolchiga uning otasi o‘g‘rilab ketilgani ma’lum qilingan. Bu haqda The Guardian xabar tarqatdi.

O‘g‘rilar Jondan pul talab qilishgan. Bundan tashqari, o‘yinchi bu haqda kimgadir aytadigan bo‘lsa, otasini o‘ldirish bilan tahdid qilishgan.

«Otam jangarilar qo‘lida bo‘lishiga qaramay, men maydonga tushishga qaror qildim. Boisi, 180 million nigeriyaliklarning umidini so‘ndira olmasdim. Men maydonga chiqish va Vatanim sharafini himoya qilish uchun barchasini xayolimdan chiqarib tashladim. Murabbiylar va Federasiya vakillari o‘g‘rilik haqida hech narsa bilishmasdi. Faqat bir necha nafar yaqin do‘stlarim bundan xabar topishgandi. Agar buni kimgadir aytsam, otamni otib tashlashlari mumkinligini menga aytishdi.

Baxtimga, dushanba kuni (oradan 6 kun o‘tib) polisiya otamni qutqardi. Hozir u shifoxonada tibbiy yordam olmoqda. Uni qiynashgan», — dedi Jon Obi Mikel.