Kecha — 5 iyul kuni Indoneziyada bo‘lib o‘tadigan Osiyo O‘yinlarining futbol musobaqasiga qur’a tashlash marosimi bo‘lib o‘tgandi. Unga ko‘ra, Ravshan Haydarov murabbiylik qilayotgan O‘zbekiston terma jamoasi “V” guruhida Tailand, Qatar hamda Bangladesh termalariga qarshi kurash olib borishi ma’lum bo‘ldi. 

Bugun esa O‘zbekiston terma jamoasining musobaqada ishtirok etishi masalasi muhokama qilindi. O‘FA termaning kengaytirilgan ro‘yxatini tashkilotchilarga taqdim etib ulgurgan. Ayni vaqtda Osiyo O‘yinlarida ishtirok etuvchi futbolchilar masalasi kunning asosiy mavzusi bo‘lib turibdi.

Bungacha MOQ rahbariyati Osiyo O‘yinlariga jiddiy e’tibor qaratish kerakligini ta’kidlab, bu borada futbolchilarga barcha sharoitlar yaratish kerakligini ma’lum qilgandi. O‘FA shundan kelib chiqib, Senegal hamda Marokashga qarshi o‘yinlarda bir qator olimpiyachilar to‘p surishini ta’minladi. Eron va Urugvay bilan o‘yinlarda esa katta ehtimol bilan Indoneziyaga boruvchi futbolchilar harakat qildi. Shuningdek, Keniyaga qarshi bo‘lib o‘tgan ikki o‘yinni ham shular qatoriga qo‘shish mumkin. Ravshan Haydarovning so‘zlariga ko‘ra, tarkib ancha shakllangan, futbolchilar Osiyo O‘yinlarida munosib ishtirok etishga tayyor.

Rejaga ko‘ra, O‘zbekiston olimpiyachilari 4 avgust kuni yig‘iladi va shu kunning o‘zida tibbiy ko‘rikdan o‘tadi. 5 avgustdan e’tiboran esa mashg‘ulotlar boshlanadi. Mamlakat sportchilarining Jakartaga jo‘nab ketish sanasi keyinroq ma’lum qilinadi.