Xabaringiz bor, shu yilning 6-18 oktyabr kunlari Argentinaning Buenos-Ayres shahrida III yozgi o‘smirlar Olimpiya o‘yinlari bo‘lib o‘tadi.

Ushbu nufuzli musobaqada ishtirok etadigan sportchilarimiz soni yana bittaga ko‘paydi. Aniqrog‘i, kuni kecha Milliy olimpiya qo‘mitasiga Xalqaro o‘q otish federasiyasidan xat keldi. Unda O‘zbekiston terma jamoasi uchun Olimpiya o‘yinlariga sportning ushbu turi bo‘yicha imtiyozli yo‘llanma taqdim etilgani ma’lum qilingandi. Unga ko‘ra, xalqaro o‘q otish federasiyasi O‘zbekiston terma jamoasi uchun qizlar o‘rtasida 10 metrga pnevmatik miltiqdan o‘q otish bo‘yicha lisenziya taqdim etdi.

O‘zbekiston o‘q otish federasiyasi esa Argentinadagi nufuzli musobaqada ishtirok etishga iqtidorli sportchimiz Zaynab Pardabayevani loyiq ko‘rdi va Buenos-Ayresdagi III o‘smirlar Olimpiya o‘yinlarida Zaynab yurtimiz sharafini himoya qiladigan bo‘ldi. Ushbu yo‘llanma orqali O‘zbekiston sport delegasiyasining Buenos-Ayres Olimpiadasi uchun lisenziyalari soni 30 taga yetdi.