Shu kunlarda chim ustida xokkey bo‘yicha Pokiston yoshlar terma jamoasi O‘zbekistonda bo‘lib turibdi.
Chim ustida xokkey bo‘yicha qit’amizning yetakchi terma jamoalaridan biri bo‘lgan pokistonliklar yurtimizda o‘quv-mashg‘ulot yig‘inlari va bir necha o‘rtoqlik uchrashuvlarini o‘tkazishdi. Jumladan, Andijonda bo‘lib o‘tgan dastlabki o‘yinda O‘zbekiston terma jamoasi 9:7 hisobida g‘alaba qozondi. Ikkinchi bahsda esa vakillarimiz 8:4 hisobida ustun kelishdi. O‘zaro uchinchi nazorat o‘yinida hamyurtlarimiz 5:2 hisobida g‘alaba qozonishdi. Samarqandda o‘tkazilgan o‘yinda esa Pokiston terma jamoasi 4:2 hisobida g‘olib bo‘ldi.
Bugun Pokiston chim ustida xokkey federasiyasi vakillari Milliy olimpiya qo‘mitasida mehmon bo‘lishdi. Tashkilot bosh kotibi Abdulatif Shax, terma jamoa menejeri Ramzan Jamali va bosh murabbiy Mister Sabrlarni Milliy olimpiya qo‘mitasi Bosh kotibi Jasur Matchanov kutib oldi.
Uchrashuv davomida tomonlar sportning ushbu turi bo‘yicha hamkorlik qilish, halqaro aloqalarni mustahkamlash borasida so‘z yuritishdi. MOQ bosh kotibi fursatdan foydalanib pokistonlik malakali murabbiylarni O‘zbekistonga taklif qildi.
Uchrashuv yakunida Jasur Matchanov Milliy olimpiya qo‘mitasi nomidan mehmonlarga esdalik sovg‘asini topshirdi.
Ma’lumot uchun, Pokiston sportning chim ustida xokkey turi bo‘yicha kattagina tajribaga ega. Terma jamoa Olimpiya o‘yinlarida uchta oltin, uchta kumush va ikkita bronza medalini qo‘lga kiritgan. Shuningdek, Pokiston terma jamoasi 4 karra jahon chempioni, 8 karra Osiyo o‘yinlari g‘olibi hisoblanadi.
