Xabar berib o‘tganimizdek, yosh gandbolchilarimiz Italiyaning Teramo shahrida Xalqaro gandbol federasiyasi tavqimiga kiruvchi 46-xalqaro «Interamnia» jahon kubogi musobaqasida ishtirok etib, musobaqa g‘olibiga aylanishdi.

Bugun mazkur bahslarda muvaffaqiyatli ishtirok etgan yosh sportchilarimiz yurtimizga qaytib kelishdi.

Ularni Islom Karimov nomidagi Toshkent xalqaro aeroportida Milliy olimpiya qo‘mitasi hamda O‘zbekiston gandbol federasiyasi mutasaddilari, sportchilarning yaqinlari va ommaviy axborot vositalari xodimlari kutib olishdi.

Eslatib o‘tamiz, sportchilarimiz musobaqa davomida «Lanester» (Fransiya), «Grunvald» (Polsha), «Virum Sorgenfri» (Daniya), «Mountada» (Marokash), «Kozanis» (Gresiya) kabi jamoalarni, finalda esa Shveysariyaning «Shenois Jeneva» jamoasini mag‘lubiyatga uchratib, shohsupaning eng yuqori pog‘onasidan o‘rin egalladilar.

Qayd etib o‘tish lozimki, bunday musobaqalar gandbolchilarimizning oldinda turgan bahslar uchun o‘ziga xos tayyorgarlik vazifasini bajaradi. Zero, bugungi kunda yurtimizda sportning jamoaviy turlarini rivojlantirishga alohida e’tibor qaratilmoqda.

Milliy olimpiya qo‘mitasi ushbu muvaffaqiyat bilan O‘zbekiston gandbol federasiyasini, g‘olib sportchilarimiz va murabbiylarni yana bir marotaba tabriklaydi.