Хабар бериб ўтганимиздек, ёш гандболчиларимиз Италиянинг Терамо шаҳрида Халқаро гандбол федерацияси тавқимига кирувчи 46-халқаро «Interamnia» жаҳон кубоги мусобақасида иштирок этиб, мусобақа ғолибига айланишди.

Бугун мазкур баҳсларда муваффақиятли иштирок этган ёш спортчиларимиз юртимизга қайтиб келишди.

Уларни Ислом Каримов номидаги Тошкент халқаро аэропортида Миллий олимпия қўмитаси ҳамда Ўзбекистон гандбол федерацияси мутасаддилари, спортчиларнинг яқинлари ва оммавий ахборот воситалари ходимлари кутиб олишди.

Эслатиб ўтамиз, спортчиларимиз мусобақа давомида «Ланестер» (Франция), «Грунвальд» (Польша), «Вирум Соргенфри» (Дания), «Моунтада» (Марокаш), «Козанис» (Греция) каби жамоаларни, финалда эса Швейцариянинг «Шеноис Женева» жамоасини мағлубиятга учратиб, шоҳсупанинг энг юқори поғонасидан ўрин эгалладилар.

Қайд этиб ўтиш лозимки, бундай мусобақалар гандболчиларимизнинг олдинда турган баҳслар учун ўзига хос тайёргарлик вазифасини бажаради. Зеро, бугунги кунда юртимизда спортнинг жамоавий турларини ривожлантиришга алоҳида эътибор қаратилмоқда.

Миллий олимпия қўмитаси ушбу муваффақият билан Ўзбекистон гандбол федерациясини, ғолиб спортчиларимиз ва мураббийларни яна бир маротаба табриклайди.