Xorvatiyalik rejissyor 1990 yilda bo‘rilar haqida film ishlaydi. Kadrga 5 yoshli Luka Modrich tushib qolgan.

Bu bolakay oradan 28 yil o‘tib, Xorvatiya terma jamoasini JCH finaliga olib chiqdi.

Xorvatiyalik hujjatli filmlar rejisyori Pavel Balenovich 80-yillar oxirida Modrichlar yashaydigan qishloq yonida bo‘rilar haqida film ishlaydi. Qishloq Viyelibit tog‘i yaqinidagi Zadar shahridan 40 km uzoqda joylashgan. Yaqinda rejisser filmni YouTube ga joyladi va unda ishonib bo‘lmas narsani topdi: otasining kurtkasida echki boqib yurgan 5 yoshli bolakay - bu Luka Modrich edi.

"Eski tosh yo‘ldan janubroqda Modrichlarni uyi bor edi. Ular juda xushmuola odamlar edi. Men tog‘lardagi suratga olish ishlaridan so‘ng ularning uyida mehmon bo‘lgandim - echki boqayotgan do‘stim va uning o‘g‘lini suratga oldim. Bu 1990 yilda, ularning uyini buzgan urush boshlanishidan oldin bo‘lgan edi", - eslaydi Balenovich.

Lukaning bobosini tez orada serblar otib ketishadi, oila qochadi va Balenovich ularni boshqa ko‘rmadi. Ammo echki boqib yurgan bolakay 15 yildan so‘ng kadrlarda ko‘proq ko‘rina boshlaydi, bu tasodif emas.