18-24 iyul kunlari Janubiy Koreyaning Jeju shahrida taevondo WTF bo‘yicha "Korea Open" reyting musobaqasi bo‘lib o‘tadi. Turnir doirasida o‘smirlar, yoshlar va kattalar o‘rtasidagi bellashuvlar tashkil etiladi.
Bahslarda Jasur Boyqo‘ziyev, Sardor Toirov, Niyoz Po‘latov, Dinoraxon Mamadibragimova, Svetlana Osipova kabi yetakchi taekvondochilarimiz qatorida bir qator umidli yoshlarimiz ham ishtirok etadilar.
Terma jamoamiz ushbu musobaqada 30 nafar sportchi bilan ishtirok etishi kutilmoqda. Murabbiylarimiz Osiyo o‘yinlari oldidan bir qator yetakchi sportchilarimizning jismoniy va ruxiy tayyorgarliklarini ham sinovdan o‘tkazib olishni maqsad qilib qo‘yishgan.
Ma’lumot uchun, musobaqada g‘oliblikni qo‘lga kiritgan sportchi 20 reyting ochkosini ishlab oladi. Ikkinchi o‘rinni egallagan taekvondochi 12 ochko, uchinchi o‘rin egasi esa 8 ochkoni o‘z hisobiga qo‘shib qo‘yadi.
Milliy olimpiya qo‘mitasi ushbu musobaqada sportchilarimizga omad tilaydi. Hamyurtlarimiz qayd etayotgan natijalar bilan Milliy olimpiya qo‘mitasi rasmiy sayti orqali xabardor bo‘lib borishingiz mumkin bo‘ladi.
