Germaniya terma jamoasi sobiq sardori, JCH-90 g‘olibi - Lotar Matteus ham nemislarning Rossiya mundialidagi omadsiz ishtiroklarida bosh murabbiy Yoaxim Lyovni ayblamoqda.
U ijtimoiy loyiha doirasida Krasnoyarskning «Tot» o‘smirlar jamoasi (Bolalar uyi tarbiyalanuvchilaridan tuzilgan) va FIFA afsonalari - Ronaldo, Iker Kasilyas, Karles Puyol, Aleksey Smertin kabi sobiq futbolchilar ishtirokidagi xayriya o‘yinida qatnashdi.
Tadbir yakunida esa jurnalistlar Matteusni qurshab olishdi.
- Germaniya termasiga o‘zi nima bo‘ldi?
- Oxirgi yil davomida jamoa atrofidagi ishlar yaxshi rivojlanmadi. Tan olish kerak, Lyov katta hajmda ish bajardi, biroq tayyorgarlik jarayonining so‘nggi bosqichini diqqat bilan tahlil qilish kerak.
Bu uning xatosi. Birinchidan, tarkib tuzishda adashdi. Lekin futbolchilarni ham oqlab bo‘lmaydi. Ularda ehtiros-ishtiyoq sezilmadi, maydonda 4 yil oldingidek o‘zaro tushunib to‘p surolmadilar.
- Natijadan qattiq ranjigandirsiz...
- Tushuning, Germaniya termasi koreyslar bilan shu qadar sust o‘ynadiki, jamoaning «pley-off»ga chiqishidan ma’no yo‘q edi.
- Endi nima bo‘ladi?
- Tabiiyki, o‘yin sifati ham, natija ham hech kimni qoniqtirmadi. Demak, 4 yilcha oldin Braziliyada katta muvaffaqiyatga erishgan jamoa nega birdan o‘zgarib qolganini chuqur tahlil qilish lozim.
- Lyov ketishi kerakmi?
- Bu haqda gapirishga erta. Murabbiy va federasiya vakillari avvalo, JCHdagi o‘yinlarni obdon o‘rganib chiqishsin. Lyov 12 yil davomida samarali ishlab, har safar jamoani yirik turnirlarning hal qiluvchi raundlariga olib chiqdi, yakunda jahon chempionatida g‘alabani ta’minladi.
Biroq endi jamoa tizimida nimadir buzildi, shekilli. Bunday holatda shoshma-shosharlik bilan keskin qaror qabul qilish yaramaydi.
- JCH-2018da eng yaxshi taassurot qoldirayotgan hujumchi...?
- Keyn juda yaxshi, jamoa uchun ishladi. Shubhasiz, u bosh to‘purar bo‘lishga asosiy da’vogar edi.
- Messining esa ishlari yurishmadi?
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
