Pepsi Superliga 17-turi doirasida Namanganning “Navbahor” klubi o‘z maydonida Jizzaxning “So‘g‘diyona” jamoasini qabul qiladi.
Mazkur klublar O‘zbekiston chempionatlarining oliy ligasida o‘zaro 45 marta uchrashishgan. Ushbu o‘yinlarda “Navbahor” 22ta yutuqqa erishgan bo‘lsa, “So‘g‘diyona” hisobidagi g‘alabalar soni 17 tani tashkil etmoqda.
Jamoalar 6ta o‘yinda durang qayd etishgan. To‘plar nisbatidagi ko‘rsatkich 81-56, “Navbahor”foydasiga. Navbahor” o‘zaro o‘yinlarda 72 ochkoni qo‘lga kiritgan bo‘lsa, jizzaxliklar hisobida 57 ochko mavjud.
“Navbahor” – “So‘g‘diyona” klublari o‘rtasidagi o‘zaro uchrashuvlardagi eng yirik hisob 1996 yili qayd etilgan. O‘shanda futbolchilarimiz Namanganda jizzaxliklar darvozasiga 7ta javobsiz to‘p kiritishgandi. Sermahsullik borasida esa 2000 va 2014 yilgi uchrashuvlar tarixda qolgan. E’tiborlisi, o‘sha o‘yinlarda darvozalarga to‘qqiztadan gol urilgan. 2000 yili Namanganda bo‘lib o‘tgan uchrashuvda mezbonlar 6:3 hisobida zafar quchishgan bo‘lsa,
2014 yili Jizzaxda o‘tkazilgan bahsda “So‘g‘diyona” 5:4 hisobida g‘alaba qozongandi. O‘tgan yili “lochinlar” Namanganda jizzaxliklarni yirik - 4:1 hisobida mag‘lubiyatga uchratishgandi.
Namanganda o‘tkazilgan so‘nggi besh uchrashuv natijalari quyidagicha:
2013 yil - “Navbahor” - “So‘g‘diyona” - 3:1
2014 yil - “Navbahor” - “So‘g‘diyona” - 4:2
2015 yil - “Navbahor” – “So‘g‘diyona” - 1:0
2016 yil - “Navbahor” - “So‘g‘diyona” - 0:0
2017 yil - “Navbahor”- “So‘g‘diyona” - 4:1
O‘zaro o‘yinlar haqida fakt: “So‘g‘diyona” shu paytgacha “Navbahor” maydonida g‘alaba qozona olmagan. Namanganda bo‘lib o‘tgan uchrashuvlarning 18tasida “lochinlar” zafar quchishgan bo‘lsa, qolgan 4ta bahsda jamoalar durangga imzo chekishgan.
Joriy mavsumning birinchi davrasida Jizzaxda bo‘lib o‘tgan uchrashuvda “So‘g‘diyona” 3:2 hisobida g‘alaba qozongandi.
Bo‘lajak bahsda sevimli jamoamizga omad yor bo‘lshini tilaymiz.
“Navbahor” PFK matbuot xizmati.
