“Metallurg” – “Neftchi” jamoalari o‘rtasidagi uchrashuvda mezbonlar milliy chempionatlarimizdagi yubiley yutuqlarini nishonlashdi.

Uchrashuvdagi yagona gol muallifi Islombek Isoqjonov esa uchrashuvning eng yaxshi futbolchisi deb topildi.

- To‘g‘risi uchrashuvdan oldin bu to‘g‘rida o‘ylamagandik. “Qo‘qon 1912” bilan o‘yindan keyin adashmasam 600-o‘yin va 200-g‘alaba haqida yozgandingiz. Ammo vaqt o‘tishi bilan yodimizdan ko‘tarilgan ekan. Yubiley g‘alaba bilan barcha ishqibozlarimizni biz ham jamoamiz nomidan tabriklaymiz.

Avvalom bor bizni yolg‘izlatib qo‘ymayotgan, qo‘llab quvvatlab kelayotgan muxlislarimizga minnatdorchilik bildirmoqchiman. Bugun chiroyli futbol namoyish eta olmagan bo‘lsak-da, kerakli g‘alabani qo‘lga kiritdik. Maqsad sari harakatni davom ettirayapmiz. Ikkinchi davraning so‘nggi to‘rtta turining har biri biz uchun finalga teng.

Og‘ir o‘yin bo‘ldi. O‘yinimiz qovushmaganligi uchun muxlislarimizdan uzr so‘raymiz. Bilmadim, taqvimning tig‘izligimi, haroratning yuqoriligimi, bolalardagi charchoq o‘yin sifatiga salbiy ta’sir ko‘rsatdi. Shuningdek, g‘alabaning juda zarurligi uchun shoshildik, bosim ta’sirini ko‘rsatdi. Hayajon o‘yinimizga xalaqit qildi. Ammo asosiysi maqsadimizga erishdik. Tarixda o‘yin emas, natija eslanadi, deydi Islombek Isoqjonov.