“Металлург” – “Нефтчи” жамоалари ўртасидаги учрашувда мезбонлар миллий чемпионатларимиздаги юбилей ютуқларини нишонлашди.

Учрашувдаги ягона гол муаллифи Исломбек Исоқжонов эса учрашувнинг энг яхши футболчиси деб топилди.

- Тўғриси учрашувдан олдин бу тўғрида ўйламагандик. “Қўқон 1912” билан ўйиндан кейин адашмасам 600-ўйин ва 200-ғалаба ҳақида ёзгандингиз. Аммо вақт ўтиши билан ёдимиздан кўтарилган экан. Юбилей ғалаба билан барча ишқибозларимизни биз ҳам жамоамиз номидан табриклаймиз.

Аввалом бор бизни ёлғизлатиб қўймаётган, қўллаб қувватлаб келаётган мухлисларимизга миннатдорчилик билдирмоқчиман. Бугун чиройли футбол намойиш эта олмаган бўлсак-да, керакли ғалабани қўлга киритдик. Мақсад сари ҳаракатни давом эттираяпмиз. Иккинчи давранинг сўнгги тўртта турининг ҳар бири биз учун финалга тенг.

Оғир ўйин бўлди. Ўйинимиз қовушмаганлиги учун мухлисларимиздан узр сўраймиз. Билмадим, тақвимнинг тиғизлигими, ҳароратнинг юқорилигими, болалардаги чарчоқ ўйин сифатига салбий таъсир кўрсатди. Шунингдек, ғалабанинг жуда зарурлиги учун шошилдик, босим таъсирини кўрсатди. Ҳаяжон ўйинимизга халақит қилди. Аммо асосийси мақсадимизга эришдик. Тарихда ўйин эмас, натижа эсланади, дейди Исломбек Исоқжонов.