Rossiyadagi JCH yakuniga yetgach, Britaniya OAV o‘z nigohlarini navbatdagi mundial mezboni - Qatarga qaratdi.
Jumladan, The Sunday Times nashri Doxani JCH-2022 mezbonligi uchun bo‘lgan saylovda g‘irromlik ishlatganlikda aybladi. Go‘yoki, qatarliklar boshqa nomzodlar ozroq ovoz olishlari uchun MRBning sobiq agentlarini ularga qarshi targ‘ibot yuritishga yollashgan.
FIFA, o‘z navbatida, mazkur materialni ko‘rib chiqmasligini ma’lum qildi. Chunki 2018 va 2022 yillardagi JCHlarga nomzodlik qilgan barcha nomzodlarning hujjatlari mavjud qonun-qoidalar asosida tekshiruvdan o‘tkazilgan.
«Manbadan olingan ma’lumotlarga ko‘ra, saylov jarayonida qatarlik tender guruhi jamoat tashkilotlari hamda MRBning sobiq agentlari AQSH va Avstraliyaga qarshi soxta tashviqot axborotlarini tarqatishlari uchun pul bergan», - deyiladi nashr bayonotida.
Shuningdek, gazeta VLJning Nyu-Yorkdagi PR-kompaniyasi rahbari Maykl Xoltsmanning Qatar tashkiliy qo‘mitasi rahbari maslahatchisi Ahmad Nimexga yo‘llagan maktubini ham e’lon qildi.
2010 yilning 17 may sanasidagi hujjatdan so‘nggi 4 oy ichida AQSH va Avstraliya nomzodlariga qarshi amalga oshirilgan tadbirlar hisoboti o‘rin olgan. Nashrning ta’kidlashicha, tadbirga jalb etilgan jurnalist va blogerlar bu mamlakatlar haqida salbiy mazmundagi materiallarni chop ettirishgan.
Bundan tashqari, bayonotda Osiyo vakillari mundialga mezbonlik qilish amerikaliklar uchun zararli ekanligi haqida ma’ruza o‘qishini ta’minlash maqsadida Merilend universiteti professori Denis Koutsga 9000 dollar berishgani ma’lum qilingan va iqtisodchi olimning ma’ruzasidan lavha keltirilgan:
«Amerikalik soliq to‘lovchilar o‘ta qimmat va musaffo bo‘lmagan turnir loyihasiga «yo‘q» deb javob berishlari maqsadga muvofiq».
Xoltsman shuningdek, 2010 yilning iyunida Avstraliyada futbolga qarshi norozilik namoyishlari rejalashtirilgani haqida xabar berdi.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
