Iordaniyaning Amman shahrida qilichbozlik bo‘yicha Osiyo kadet sikli doirasidagi navbatdagi musobaqa bo‘lib o‘tdi. Bu safargi musobaqada qit’amizning to‘rtta mamlakatidan 24 nafar sportchi ishtirok etdi. Unda o‘zbekistonlik yosh qilichbozlar ham sovrinli o‘rinlar uchun kurash olib borishdi.
Quvonarlisi, sablya bo‘yicha bellashuvlarda ishtirok etgan to‘rt nafar sportchimizning uch nafari sovrindorlar qatoridan joy oldi.
Chorak final doirasida kechgan bahslarda Sherzod Mamutov BAA vakilini, Jaloliddin Dushamboyev quvaytlik raqibini, Bobur Rasulov iordaniyalik sportchini mag‘lubiyatga uchratishdi. Yarim finaldagi «o‘zbek derbisi»da Jaloliddin Dushamboyev Sherzod Mamutovni mag‘lubiyatga uchratib finalga yo‘l oldi. Bobur Rasulov esa quvaytlik Muhammad Alfadhliga imkoniyatni boy berdi. Oltin medal uchun kechgan bahsda Quvayt terma jamoasi a’zosi Muhammad Alfadhli Jaloliddin Dushamboyevni mag‘lubiyatga uchratdi.
Shu tariqa, Iordaniyadagi Osiyo kadet sikli musobaqasida Jaloliddin Dushamboyev kumush, Sherzod Mamutov va Bobur Rasulovlar bronza medalini qo‘lga kiritdilar.
Eslatib o‘tamiz, iyul oyida Xitoyning Usi shahrida o‘tkazilgan Osiyo kadet sikli bahslarida sportchilarimiz Pazil Genjabayev oltin, Sherzod Mamutov esa kumush medalga sazovor bo‘lgandi.
