Ertaga “Qo‘qon-1912” jamoasi Pepsi superligasi 21-tur doirasida o‘z maydonida Toshkentning “Paxtakor” klubini qabul qiladi. Ushbu o‘yinga doir statistik ma’lumotlar bilan tanishing.
O‘zaro o‘yinlar
“Paxtakor” va “Qo‘qon-1912” shu kunga qadar O‘zbekiston chempionatlarida 25 marta to‘qnash kelishgan. Toshkent klubi 14 marta g‘olib bo‘lgan, 6 ta o‘yinda durang qayd etilgan. Qo‘qonliklar hisobida 5 ta g‘alaba mavjud. To‘plar nisbatida ham “Paxtakor” oldinda – 68:36. O‘zaro o‘yinlarda “Paxtakor” 48, “Qo‘qon-1912” 21 ochkoni qo‘lga kiritgan.
O‘tgan yili Qo‘qonddagi bellashuvda 1:1 hisobi qayd etilgan.
Qo‘qonda o‘tgan so‘nggi besh uchrashuv:
06.05. 2017 «Qo‘qon-1912» – «Paxtakor» 1:1
08.08.2016 «Qo‘qon-1912» – «Paxtakor» 1:1
05.07.2015 «Qo‘qon-1912» – «Paxtakor» 2:2
02.11.2003 «Qo‘qon-1912» – «Paxtakor» 3:2
04.06.2002 «Qo‘qon-1912» – «Paxtakor» 1:3
O‘zaro o‘yinlar haqida fakt: Bu jamoalarning Qo‘qonda o‘tgan o‘yinlarida jamoamiz 4 bor zafar quchgan. To‘rtta bahsda g‘olib nomini aniqlashning imkoni bo‘lmagan. So‘nggi uchta uchrashuvda durang natija qayd etilgan.
Hakamlar
12-avgust kuni Qo‘qonda bo‘lib o‘tadigan super uchrashuvni Sherzod Qosimov boshchiligidagi hakamlar guruhi boshqarib boradigan bo‘lishdi.
Ushbu referi mazkur jamoalarning birinchi davradagi uchrashuvini ham boshqargan.
Umuman olganda, Sherzod Qosimov joriy mavsumda jamoamiz ishtirokidagi to‘rtinchi o‘yinda faoliyat yuritadi. U boshqargan o‘yinlarda jamoamiz bitta g‘alaba, ikkita durangga erishgan.
Yana bir qiziq jihati shundaki, Sherzod Qosimov jamoamizning AGMKga qarshi kechgan har ikki o‘yinida ham ishlagan. “Paxtakor” klubiga qarshi bo‘lib o‘tadigan uchrashuvda bu ko‘rsatkich yana takrorlanadi.
PEPSI Superliga, 21-tur.
Qo‘qon-1912 – Paxtakor
Hakamlar: Sherzod Qosimov, Rasul Fozilov, Mo‘min Majidov, Jasur Muxtorov.
Nazoratchi: Sayfiddin Ermatov.
Komissar: Ma’mur Saidqosimov.
Boshlanish vaqtlari
Ushbu uchrashuv yakshanba kuni soat 18:30da “Markaziy” o‘yingohda bo‘lib o‘tadi. Bugun esa xuddi shu stadionda o‘rinbosarlar bahsi o‘tkaziladi. Bugungi bellashuv soat 16:45da start oladi. Barcha muxlislarni stadionga chorlab qolamiz.
