O‘zbekiston Respublikasi Prezidentining PQ-3610-sonli “Futbolni yanada rivojlantirish chora-tadbirlari to‘g‘risida”gi qaroriga asosan tashkil qilingan hududiy bolalar va o‘smirlar futbol akademiyalariga qabulning ikkinchi bosqichi 1 avgust kunidan boshlanganidan futbol ixlosmandlarining xabarlari bor.   Hozirda Respublikamizning barcha hududlari bo‘ylab bolalar va o‘smirlar futbol akademiyalariga qabul davom etyapti. 2-bosqich imtihonlari 4 ta yo‘nalish bo‘yicha tashkil qilingan. Birinchi yo‘nalishda bolalar ikki jamoaga bo‘linib, 30 daqiqadan ikkita taym futbol o‘ynashadi. O‘yin davomida ularning maydondagi harakatlari baholanadi. Ikkinchi yo‘nalishda esa ular o‘rtasida diqqat va e’tiborni mustahkamlashga qaratilgan testlar o‘tkaziladi.  Uchinchi yo‘nalishda to‘p bilan muomala  va tezlik, to‘rtinchi yo‘nalishda esa darvozaga aniq zarba yo‘llash texnikasi tekshiriladi.   Sinov jarayonlari shaffof tarzda o‘tishini ta’minlash maqsadida O‘zbekiston futbol assosiasiyasi vakillari nazorati o‘rnatilib, jarayonlar videotasvirga olinmoqda. OAV vakillari tomonidan qabul jarayonlari kuzatilib, voqealar rivoji yoritib borilmoqda.

Quyida Samarqand viloyati bolalar va o‘smirlar futbol akademiyasiga o‘tkazilayotgan qabul jarayonlari aks etgan fotosuratlarni tomosha qilishingiz mumkin.