Bugun, 18 avgust kuni Indoneziyada XVIII Osiyo o‘yinlarining tantanali ochilish marosimi bo‘lib o‘tadi.
O‘z bag‘riga 76 000 dan ziyod tomoshabinni sig‘dira oladigan muhtasham stadionda qit’adagi to‘rt yillikning eng nufuzli musobaqasi rasman start oladi.
Mahalliy vaqt bilan 18:08da (Toshkent vaqti bilan 16:08) boshlanadigan tantanali marosimda ishtirokchi mamlakatlar vakillari o‘z bayroqlari bilan stadion bo‘ylab chiqish qilishadi. O‘zbekiston sport delegasiyasida bokschi, Osiyo chempioni, Osiyo o‘yinlari sovrindori Isroil Madrimov bayroqdor vazifasini bajaradi.
Asosiy musobaqalarga esa ertaga start beriladi. Unda birinchilardan bo‘lib suzish, erkin kurash, ushu, o‘q otish, akademik eshkak eshish, tennis hamda qilichbozlik bo‘yicha bahslarda sportchilarimiz o‘z ishtiroklarini boshlashadi.
