Bugun Indoneziyaning Jakarta va Palembang shaharlarida XVIII Osiyo o‘yinlari start oldi.

Musobaqaning dastlabki kunida hamyurtlarimiz bir necha sport turida bahslarda ishtirok etishdi va kun yakuniga ko‘ra uchta medalni delegasiyamizga qo‘shib qo‘yishdi. E’tiborlisi, qo‘lga kiritilgan har uchchala medal erkin kurashchilarimiz hissasiga to‘g‘ri keladi.

Avvaliga, -65kg vazn toifasida bahslarda ishtirok etgan Sirojiddin Hasanov terma jamoamizga bronza medalini taqdim etgan bo‘lsa, -74kg vazn toifasida yurtimiz sharafini himoya qilgan Bekzod Abdurahmonov O‘zbekistonga ilk oltin medalni keltirdi. -97kg vaznli Magomed Ibragimovning bronzasi esa delegasiyamiz medallari sonini uchtaga yetkazdi.

Birinchi kun yakuniga ko‘ra, O‘zbekiston terma jamoasi medallar jamg‘arish bo‘yicha qit’amizning 45 mamlakati ichida hozircha sakkizinchi o‘rinni egallab turibdi.