Indoneziyada davom etayotgan Osiyo o‘yinlarining bugungi tongida sportchilarimiz birdaniga 3ta medalni qo‘lga kiritishdi. Akademik eshkak eshish bo‘yicha final bahslarida ishtirok etgan atletlarimiz delegasiyamiz hisobiga bir komplekt medallar shodasini taqdim etishdi.

Har bir sportchidan ikkitadan eshkak bo‘lgan yo‘nalishda finalda qatnashgan Shahboz Abdujabborov va Shahboz Xolmurzayev juftligi marraga birinchi bo‘lib yetib borishdi. Ular xitoylik raqiblarni yarim soniyaga ortda qoldirishdi. Tailandlik eshkak eshuvchilar bronza medallariga ega bo‘lishdi.

Akademik eshkak eshishning yana bir yo‘nalishi — sportchilarda bittadan eshkak bo‘lgan usulda juftlikda ishtirok etgan Sardor To‘lqinxo‘jayev va Alisher Turdiyev juftligi marraga ikkinchi bo‘lib yetib kelishdi. Kumush medal! Vakillarimiz xitoyliklardan ortda qolishgan bo‘lsa, Yaponiya bronza medaliga ega bo‘ldi.

Akademik eshkak eshishning yana bir finalida o‘zbekistonliklar delegasiyamizga yana bir medalni tortiq etishdi. I.Mambetnazarov, SH.Najmiyev, SH.Hakimov, Z.Usmonovdan iborat to‘rtlik jamoamiz finishga uchinchi bo‘lib yetib kelishdi. Hamyurtlarimiz masofaning 3/4 qismigacha 2-o‘rinda kelishayotgandi. So‘nggi 500 metrda ular indoneziyaliklarni o‘tkazib yuborishdi. G‘oliblik xitoyliklarga nasib etdi.