Indoneziyada davom etayotgan Osiyo o‘yinlari musobaqasining sakkizinchi kunida o‘zbekistonlik sportchilar uchun delegasiya hisobiga 6 ta medal qo‘shib qo‘ydilar.
Jumladan, penchak silat sport turi bo‘yicha yarim finalda indoneziyalik Iqbal Pratamaga qarshi jang qilgan Abdumalik Salimov raqibiga 0:5 hisobida mag‘lub bo‘ldi. Ammo shunga qaramay, bronza medaliga sazovor bo‘ldi.
Karatechi Cadriddin Saymatov bronza medali uchun vyetnamlik Xai Nguyenga qarshi jang o‘tkazdi va 1:8 hisobida g‘alaba qozondi.
Yana bir karatechi Barno Mirzayeva bronza medali uchun jangda tailandlik Arm Sukkiauni 2:1 hisobida mag‘lub etdi. Navbatdagi bronza ham qo‘lga kiritildi.
Og‘ir atletika bo‘yicha Omadoy Otaqo‘ziyeva dast ko‘tarishda 101, siltab ko‘tarishda 131, umumiy hisobda esa 232 kg toshni o‘ziga bo‘ysundirdi. Va Omadoyning omadi kelib, delegasiya hisobiga kumush medalni taqdim etdi.
Kunning eng quvonarli voqeasi, og‘ir atletika bo‘yicha Ruslan Nuriddinovning Osiyo o‘yinlarida oltin medal hamda rekord o‘rnatgani bo‘ldi. Ruslan dast ko‘tarishda 191 kg, siltab ko‘tarishda esa 227 kg tosh ko‘tardi. Umumiy hisobda 421 kg natija ko‘rsatgan Ruslan Indoneziyadagi Osiyo o‘yinlarida O‘zbekiston sport delegasiyasiga oltinchi oltin medalni qo‘shib qo‘ydi.
Ma’lumot o‘rnida, ushbu oltin medal o‘zbekistonlik og‘ir atletikachilar uchun Osiyo o‘yinlari tarixidagi birinchisi hisoblanadi.
Bosqon uloqtirish bahslarida Suhrob Xo‘jayev 74,06 natija ko‘rsatdi. Bu Suhrobning mavsumdagi eng yaxshi ko‘rsatkichi bo‘ldi. Ushbu natija esa O‘zbekiston delegasiyasiga 11-bronza medalini taqdim etdi.
Bundan tashqari, bugun o‘z vazn toifasida ringga ko‘tarilgan uch bokschi – Jamshid Latipov, Shunqor Abdurasulov va Bobousmon Boturovlar raqiblarini mag‘lub etib, saralash bahslarini muvaffaqiyatli boshladilar.
Shu tariqa, o‘zbekistonlik sportchilar Osiyo o‘yinlarining sakkizinchi kunida delegasiya hisobiga 6 ta medalni qo‘shib qo‘ydilar. O‘zbekiston ayni vaqtda 6 ta oltin, 11 ta kumush va 11 ta bronza, umumiy hisobda 28 ta medal bilan 35 mamlakat orasida 10-o‘rinni egallab turibdi.
Ro‘yxatning kuchli uchligidan Xitoy (174), Yaponiya (122) hamda Janubiy Koreya sport delegasiyalari joy olgan.
