Dzyudo bo‘yicha Osiyo o‘yinlarida ishtirok etayotgan Diyorbek O‘rozboyev musobaqa g‘olibiga aylandi. 

Diyorbek finalda yaponiyalik Toru Shishimega qarshi gilamga chiqdi va oltin maho evaziga raqibini mag‘lub etib, oltin medalni qo‘lga kiritdi. 

Shu tariqa, O‘zbekiston sport delegasiyasi hisobidagi oltin medallar soni 10 taga yetdi, terma jamoa umumiy ro‘yxatda 1 o‘ringa yuqoriladi va onlayn jadvalda 8-o‘rinni egallab turibdi. 

Ma’lumot o‘rnida, bu yilgi musobaqalarda o‘zbekistonlik sportchilar oltin medal to‘plash bo‘yicha Inchxon-2014 musobaqasidagi natijani yangiladilar.

Vakillarimiz 4 yil avvalgi Osiyo o‘yinlarida 9 ta oltin medal yutishgan. Umumjamoa hisobida esa 45 ta medal olib, musobaqani 11-o‘rinda yakunlaganlar.