Indoneziyaning Jakarta va Palembang shaharlarida bo‘lib o‘tayotgan Osiyo O‘yinlarida O‘zbekiston delegasiyasi hisobi yana bir oltin medali bilan boyidi.

Vadim Menkov o‘zining eng sevimli yo‘nalishi — kanoeda eshkak eshish bo‘yicha 100 metr masofaga o‘tkazilgan final bahslarida marraga birinchi bo‘lib yetib keldi. Masofaning yarmigacha hamyurtimiz oldinda borayotgandi, ammo 750 metr masofaga kelib xitoylik Jeng Peng Fey o‘zbekistonlik sportchidan 1 soniya oldinga o‘tib oldi. Ammo masofaning qolgan 250 metr masofasida qandaydir baxtsiz hodisa ro‘y berdi shekilli, Xitoy vakili finishgacha yetib kela olmadi. Ikkinchi pog‘onani tojikistonlik Shahriyor Daminov egallagan bo‘lsa, bronza medali eronlik Muhammad Nabi Rizoiyga nasib etdi.

Vadim Menkov esa o‘z faoliyati davomida ushbu yo‘nalishda ketma-ket to‘rtinchi marta (Doha-2006, Guangjou-2010, Inchxon-2014 va Indoneziya-2018) g‘oliblikni qo‘lga kiritdi.

Shu tariqa, O‘zbekistonning oltin medallari soni 13taga yetdi. Delegasiyamiz medallar jadvalida Xitoy Taypeyini quvib o‘tib, 6-o‘ringa ko‘tarilib oldi.