Indoneziyada davom etayotgan Osiyo o‘yinlarining o‘n ikkinchi kuni ham yakuniga yetdi. Bugun o‘zbekistonlik sportchilar jami 8 ta medalni delegasiya hisobiga qo‘shib qo‘ydilar. 

Jumladan, kanoeda eshkak eshish bo‘yicha ayollar o‘rtasida 500 metr masofaga o‘tkazilgan bahslarda Dilnoza Rahmatova/Nilufar Zokirova tandemi marraga ikkinchi bo‘lib yetib bordi va kumush medalni qo‘lga kiritdi. 

Eshkak eshish bo‘yicha yana bir sportchi Vadim Menkov Osiyo o‘yinlarining to‘rt karra chempioniga aylandi.Vadim marraga birinchi bo‘lib yetib bordi va yakunda musobaqa g‘olibiga aylandi. 

Bu Vadim uchun Osiyo o‘yinlaridagi to‘rtinchi oltin bo‘lib, bungacha u Doxa, Guanchjou va Inchxonda o‘tkazilgan Osiyo o‘yinlarida chempion bo‘lgan. U bunday natijaga erishgan birinchi o‘zbek sportchisi bo‘ldi. 

Shundan so‘ng eshkak eshuvchilardan yana bitta medal qo‘lga kiritildi. 1000metrga juftlik bahslarida startga chiqqan Shahriyor Mahkamov va Shohruhbek A’zamov marraga uchinchi bo‘lib yetib keldi va bronza medaliga sazovor bo‘ldilar. 

1000 metrga kanoeda eshkak eshgan Nurislom To‘xtasin o‘g‘li va Serik Mirbekov juftligi marraga uchinchi bo‘lib yetib bordi va bronza medali bilan taqdirlandi. 

Kunning ikkinchi yarmi o‘zbek kurashining jahondagi tantanasi bilan boshlandi.YA’ni, Kumush Yuldasheva Osiyo o‘yinlarida O‘zbekiston hisobiga 14-oltin medalni taqdim etdi. Bu kurashchilarning Osiyo o‘yinlaridagi o‘ninchi medali bo‘ldi.

Shundan so‘ng, yana kurashda o‘zbekcha final bo‘lib o‘tdi.SHermuhammad Jandreev vatandoshi Yahyo Imomovni mag‘lub etib, oltin medalga ega chiqdi. Yahyo Imomov esa kumush medal bilan cheklandi. 

Shuningdek, bugunning eng oxirgi medalini dzyudo bo‘yicha Gulnoza Matniyazova oldi. U bronza medali uchun bahsda xitoylik Ya Juni mag‘lub etib O‘zbekiston delegasiyasiga 53-medalni taqdi etdi.

Shu tariqa, O‘zbekiston sport terma jamoasi Osiyo o‘yinlari-2018 musobaqasining o‘n ikkinchi kunida jami 8 ta medalni hisobiga “+” qildi. Ularning 3 tasi oltin, 2 tasi kumush va yana 3 tasi bronza hisoblanadi. 

O‘zbekiston sport terma jamoasi umumiy ro‘yxatda bir o‘ringa ko‘tarilib, 6-o‘ringa chiqdi. Ro‘yxatning kuchli uchligini yana Xitoy (241 ta medal umujamoa hisobida), Yaponiya (174) va Janubiy Koreya (141) egallab turibdi.