O‘zbekiston futbol assosiasiyasi hamda Andijon futbool assosiasiyasi bilan hamkorlikda futbolni yanada ommaviylashtirish, yoshlar o‘rtasida sog‘lom turmush tarzini keng targ‘ib qilish, asosiysi - qishloq yoshlari ichidan eng iqtidorli sportchilarni  tanlab olish maqsadida viloyatda mavjud 878ta mahalla jamoalari o‘rtasida “Hokim Kubogi” musobaqasi tashkil qilindi.

Musobaqaning mahallalardagi har bir o‘yini ommaviy sayl darajasida o‘tgani e’tirofga molik.  

Musobaqada 18 yoshdan 30 yoshgacha bo‘lgan mahalla yoshlaridan tuzilgan jamoalar ishtirok etishdi.  Jamoalar birinchi bosqichni o‘z sektorlarida o‘tkazib, g‘oliblar ikkinchi bosqich -  tuman birinchiligida kuch sinashdilar. O‘z tumanida g‘olib bo‘lgan jamoalar viloyat bosqichiga yo‘l oldi.

1 avgust kuni boshlangan turnirning final o‘yini Mustaqillik bayrami kunlari "Barkamol avlod" stadionida o‘tkazildi. Unda Andijon tumanining "Jahonobod" MFY yoshlaridan tuzilgan jamoa, Andijon shahar "Bunyodkor" mahallasi jamoasiga qarshi maydonga chiqdi.

Bahs futbol muxlislarida katta qiziqish uyg‘otib, stadionga ko‘plab tomoshabinlar tashrif buyurdilar. Asosiy sovrin uchun o‘tgan uchrashuvda Andijon shahrining "Bunyodkor" jamoasi raqiblari ustidan 1:0 hisobida g‘alaba qozondi.

Tantanali taqdirlash marosimida sovrindor jamoalarga viloyat hokimi Shuhratbek Abdurahmonov qimmatbaho sovg‘alar, sport velosipedlari, televizorlar, sport anjomlari jamlanmalarini sovg‘a qilgan bo‘lsa, g‘olib "Bunyodkor" mahallasiga zamonaviy mini-stadion qurish uchun 200 million so‘mlik ramziy chekni topshirdi.

Mazkur musobaqa har yili an’anaviy tarzda o‘tkazib borilishi rejalashtirilgan.