Bugun "Bunyodkor" akademiyasi maydonida o‘tkazilgan Yoshlar ligasining 23-turidan o‘rin olgan "Bunyodkor" - "Buxoro" bahsida "qaldirg‘ochlar" ishonchli g‘alabaga erishdi.

O‘yin ikkala jamoaning teng kurashlari ostida boshlandi va birinchi bo‘limning dastlabki o‘n daqiqaligida himoyachimiz jarima maydonchasi ichida qo‘li bilan to‘pni o‘ynagani uchun uchrashuv hakami "Bunyodkor" darvozasiga penalti belgiladi. Penaltini esa jamoamiz sardori Eldor Adhamov ishonch bilan qaytardi va shundan so‘ng yoshlarimiz tashabbusni qo‘lga olishdi.

Mirjahon Mirahmadov birinchi bo‘limning o‘zida ikki bor raqib drvozasini ishg‘ol etdi. Ikkinchi bo‘lim ham "yosh qaldirg‘ochlar"ning ketma-ket hujumlari ostida boshlandi va natijada Mirjahon Mirahmadov "Buxoro" darvozasiga uchinchi golini kiritib, xet-trik qayd etdi. O‘tkazib yuborilgan goldan so‘ng "Buxoro" futbolchilari tashabbusga ega bo‘lishdi va Eldor Adhamovning darvozasini ishg‘ol etishga muvaffaq bo‘lishdi. Ozodbek Qurbonov gol muallifi bo‘ldi. "Bunyodkor" a’zolari ushbu golga tezda javob qaytarishdi, navbatdagi gola muallifi Jahongir Abdusalomov bo‘ldi.

O‘yinga qo‘shimcha daqiqalar qo‘shib berilgan vaqtda "Buxoro" futbolchilari ikknchi bor gol kiritishga muvaffaq bo‘ldi va shu tariqa o‘yin 4-2 hisobida "Bunyodkor" yoshlarining ishonchli g‘alabasi bilan yakunlandi.