Misr futboli yulduzi Muhammad Saloh Rossiya mundiali chog‘i mamlakat futbol rahbariyatining ishidan aslo qoniqmagan ko‘rinadi. Har holda, u bu borada ochiq-oydin gapira boshladi.
Qiziq, Chechenistonda «Liverpul» hujumchisiga aynan nima yoqmagandi? Grozniyda u va Misr termasi qanday noqulayliklarga duch kelgan?
O‘zi JCH o‘yinlari davom etayotgan kunlar ham Saloh mahalliy rahbarlarning jamoa bazasiga tez-tez bosh suqishlaridan zada bo‘lgani haqida gap-so‘zlar tarqalgandi.
Emishki, Checheniston prezidenti tashrifi sabab, futbolchining uyqusini ham buzishgan...
- Shaxsan men himoya ishlarini kuchaytirishni so‘radim. Bunda faqat o‘zim emas, Misr termasining barcha futbolchilari xavfsizligini o‘yladim. Gap shundaki, jahon chempionati davom etayotgan bir pallada bizni juda ko‘p bezovta qilishdi.
Qolaversa, 2 marta restoranga bormoqchi bo‘ldim, ammo ruxsat berishmadi: «Yo‘q, xavfsizlik nuqtai nazaridan tashqariga chiqishingiz mumkin emas». Shuningdek, har qadamda odamlar qurshovida qoldim..., — dedi Saloh The Guardian nashriga bergan intervyusida.
Futbolchi bundan tashqari, turli mehmonlar bilan ko‘rishish, gaplashishdan charchaganini alohida ta’kidladi. Umuman olganda, u Misr futbol federasiyasiga qarshi chinakamiga jang boshlagan ko‘rinadi. Xabaringiz bo‘lsa, mundialdan oldin ham hujumchi va federasiya o‘rtasida tushunmovchilik yuzaga kelgandi.
Ya’ni rahbarlar Salohning o‘zini xabardor qilmay turib, uning suratini Misr termasi samolyotida aks ettirishgani mojaroga yo‘l ochgandi. Turnirdan keyin esa federasiya mas’ullari mamlakat futbolining birinchi raqamli yulduzi maktublariga javob bermay qo‘yishibdi.
Mo bu haqda «Tvitter»dagi sahifasida arab tilida yozdi. Xullas, APL-2017|2018ning bosh goleadori Misr termasi atrofidagi voqealardan mutlaqo norozi. Bunda Grozniyda ro‘y bergan voqealar o‘rni ham bor, albatta.
Xo‘sh, Checheniston poytaxtida Saloh bilan aynan nima yuz bergan? «Jamoamiz uchun aynan Grozniyni tanlashganidan manmunman. Bu yerda hammasi zo‘r», — degandi hujumchi iyun oyi boshida Checheniston zaminiga qadam qo‘ygach. Mo Misr termasining birinchi mashg‘ulotida jarohat tufayli qatnashmagan bo‘lsada, «Axmat-Arena»da ko‘rinish berdi.
U stadionga Ramzan Qodirov va Magomed Daudov hamrohligida kirdi. Umuman, o‘sha kuni arenada naq 8 ming muxlis to‘plandi. «Misr termasi va «Liverpul» bosh yulduzi Muhammad Saloh bilan yo‘lakka chiqqanimizda, tribunalarda kuchli hayririq ko‘tarildi. Biz stadionga The Local mehmonxonasidan stadiongacha borishda birga bo‘ldik.
Saloh Chechenistonda uni shunchalik sevishlari va hurmat qilishlarini ko‘rib, quvonish barobarida rosa hayajonlandi», — deb yozgandi respublika rahbari «Vkontakte» tarmog‘ida. Misrliklar JCHda omadsiz ishtirok etishdi, ha, Salohning o‘zi 2ta gol urdi, ammo jamoasining loaqal 1 ochko ololmay, guruh bosqichidan keyin ortga qaytgani - uning uchun yaqqol xafagarchilik.
Lekin bu hol Checheniston hukumatini aslo qiziqtirmasdi. JCH o‘rtalariga kelib, deyarli har kuni Salohga bog‘liq yangi-yangi xabarlar tarqaldi.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
