Madridning «Real» jamoasi bosh murabbiyi Xulen Lopetegi El transistor vakillari uyushtirgan intervyuda turli mavzudagi savollarga javob berarkan, «Qirollik klubi»ga o‘tganidan hech qachon afsuslanmasligini qo‘shimcha qildi.
- O‘tgan yozda sodir bo‘lgan voqealar sizni ranjitmadimi?
- Shunchaki, o‘z qarorimni chiqardim va agar yana shunday imkoniyat berishsa, ayni yo‘lni tanlab, bundan zarracha afsuslanmasdim.
- Bugungi «Real» siz qachonlardir to‘p surgan jamoadan farqlanadimi?
- Jamoa ancha o‘sishga erishdi, XX asrning eng yaxshi klubi deb topilgani ham bejiz emas: «Real» oldinga katta qadam tashladi.
- Ammo siz ham avvalgidek emassiz, shundaymi?
- Albatta, hamma qatori yoshim o‘tyapti, tajriba to‘pladim. Oldin futbolchi edim, endi esa murabbiyman...
- Sizga klubda ishlash ma’qulmi yoki termadami?
- Mening asosiy vazifam - futbolchilarni shug‘ullantirish, jamoani boshqarib, uning g‘alabasini ta’minlash. Garchi kundalik grafik farq qilsada, ham klub, ham terma murabbiyidan bor kuchini sarflash talab etiladi.
- Terma haqida gapirish siz uchun og‘irmi?
- Aslo unday emas. «Real»da ishlayotganimdan baxtiyorman, termaning esa Luis Enrike boshchiligidagi ishlari yurishishini xohlayman. Har qanday holatda ham Ispaniya milliy jamoasi muxlisi bo‘lib qolaman.
Termadagi ish - ortda qolgan bosqich, hozir bor e’tiborim «Real» mashg‘ulotlariga qaratilgan. Bizning katta maqsadlarimiz bor, ularni bajarish uchun katta kuch talab etilgani bois, boshqa narsalar haqida o‘ylashga vaqt qolmaydi. Bu ishga 100 foiz kuchimni sarflayman.
- Termadan chetlatishlari siz uchun kutilmagan zarba bo‘ldimi?
- Sodir bo‘lishi kerak bo‘lgan voqea ro‘y berdi - endi uni o‘zgartirib bo‘lmaydi: ortga nazar tashlashga xohishim yo‘q. Nimani his qilayotganimni avval aytib o‘tdim, tuyg‘ularim o‘zgarmagan. Hamon eng to‘g‘ri yo‘lni tutdim, deb hisoblayman - «Real»ga «ha» dedim va buni yana takrorlardim.
- «Real»dan o‘zingiz uchun ma’qul taklif tushdi, ammo terma bilan amaldagi shartnomani oxiriga yetkazib qo‘yishingiz kerak edi. Aks holda, ketadigan bo‘lsangiz jarima to‘lardingiz...
- To‘g‘ri. Bu o‘tmishimning bir qismi va uni muhokama qilmoqchi emasman. «Real»ga ijobiy javob qaytarganimga qaramay, termadagi vazifalarimni bajarishda davom etayotgandim. Albatta, shartnomaga tovon puli ham kiritilgandi... o‘tgan ishni endi o‘zgartirib bo‘lmaydi.
Biz «Real» bilan adolatli yo‘ldan bordik, nimaga ishongan bo‘lsak, shunga ko‘ra ish tutdik... imkon qadar to‘g‘ri yo‘l tanlashga intildik, mas’uliyatni his qildik.
- Buni terma futbolchilari qanday qabul qilishdi, sizga nima deyishdi?
- Ular nima qilish kerakligini bilishardi - bor e’tiborni mundialga qaratishdi... Futbolchilar bilan gaplashdim, ammo bu suhbat mavzusi o‘rtamizda qoladi. «Real» taklifiga ko‘nishni xohlaganim sababli shunday yo‘l tutdim... vijdonan ish ko‘rishga intildim.
- Krishtianu bilan gaplashdingizmi? Uning fikrini o‘zgartirishga urinib ko‘rdingizmi?
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
