Slovakiyaning Trnava shahrida sport kurashlari bo‘yicha yoshlar o‘rtasidagi jahon chempionati nihoyasiga yetdi. Musobaqaning so‘nggi kunida erkin kurash bo‘yicha bahslar tashkil qilindi.
-125kg vazn toifasida yurtimiz sharafini himoya qilgan sportchimiz Hasanboy Rahimov musobaqa davomida Qozog‘iston, Armaniston, AQSH vakillarini mag‘lubiyatga uchratib, yarim finalgacha yetib bordi. Final ostonasida kechgan jangda afsuski rossiyalik Soslan Xinchagovga 6:7 hisobida imkoniyatni boy berib qo‘ydi. Bronza medali uchun o‘tkazilgan bahsda esa eronlik Amir Nader Yarini 6:4 hisobida mag‘lubiyatga uchratib, sovrindorlar qatoridan joy oldi.
Eslatib o‘tamiz, bungacha Slovakiyadagi jahon chempionatida yunon-rum kurashi bahslarida Mahmud Bahshilloyev, ayollar kurashida esa Aktenge Keunimjayeva va Nabira Yesenbayeva kumush medalni qo‘lga kiritgandilar. Shu tariqa, O‘zbekiston terma jamoasi yoshlar o‘rtasidagi jahon chempionatidan 3ta kumush va 1ta bronza medali bilan qaytadigan bo‘ldi.
