Qarshining “Nasaf”klubi OFK lisenziyalash talablarini bajara olmadi. Bu haqda jurnalist Diyor Imomxo‘jayev ma’lum qildi.

“Nasaf” futbol klubida professional jamoa uchun nima kerak bo‘lsa, hammasi bor: baza, stadion, akademiya, kiyim tikish fabrikasi, videostudiya va hokazo. Agar O‘zbekistonning qolgan jamoalari ham “Nasaf” singari bo‘lganida, futbol hozirgi holatidan ikki qadam oldinga tashlashi mumkin edi.

Shunga qaramay, “Nasaf” OFK lisenziyalash talablarini bajara olmadi (bajarishini istashmadi). Tushunishim bo‘yicha, klubda ichki nizolar bor. Vaholanki, klublarni lisenziyadan o‘tkazish masalasiga jiddiy e’tibor berilishi kerak. Kimdir yo‘qni bor qilib ko‘rsatayotgan vaqtda, “Nasaf” borini ham ko‘rsata olmadi. Bu ish bo‘yicha klub rahbariyati O‘zbekiston futbol assosiasiyasiga tushuntirish beradi.

2019 yil uchun Professional futbol ligasining Superliga, Pro-Liga, 2-liga va bolalar futboli uchun talablari ishlab chiqilmoqda. Superliga talablari bunda OFK talablaridan yuqoriroq bo‘lishi ko‘zda tutilgan. Biz bir amallab tashqi mehmonlarni aldashimiz mumkin, lekin o‘zimizni aldamasligimiz kerak. PFL talabidan o‘ta olgan jamoa OFK talabidan o‘tishda qiyinchilikka duch kelmasligi kerak”, deya yozadi Imomxo‘jayev.