Xabar berib o‘tganimizdek, poytaxtimiz tennis bo‘yicha ayollar o‘rtasidagi nufuzli musobaqaga mezbonlik qilmoqda. Mukofot jamg‘armasi 250 000 AQSH dollarini tashkil etuvchi «Tashkent Open» turnirida jahonning turli mamlakatlaridan tennis malikalari sovrinli o‘rinlar uchun kurash olib bormoqdalar.

Kecha o‘tkazilgan bahslarda O‘zbekistonning birinchi raketkasi Sabina Sharipova rossiyalik Margarita Gasparyaga qarshi o‘yin o‘tkazdi. 1 soat 19 daqiqa davom etgan bahsda afsuski, 2:6, 2:6 hisoblarida mag‘lub bo‘ldi. Juftlik bahslarida esa Nigina Abduraimova rossiyalik Anna Kalinskaya bilan birga kortga chiqdi. Ammo ular ham ilk davrada 1 soat 25 daqiqa davom etgan o‘yinda Gasparyan/Potapova (Rossiya) tandemiga 5:7, 3:6 hisoblarida imkoniyatni boy berishdi.

Bugun esa Nigina Abduraimova yakkalik bahslarida germaniyalik Mona Bertelga qarshi o‘yin o‘tkazdi. 1 soat 58 daqiqa kechgan uchrashuvda Nigina 4:6, 3:6, 3:6 hisoblarida yutqazdi. Boshqa bir hamyurtimiz Oqgul Omonmurodova juftlik bahslarida kanadalik Ejeni Bushar bilan birga ishtirok etdi. Kozlova (Ukraina) / Zvonaryova (Rossiya) tandemiga qarshi o‘tkazilgan o‘yinda Oqgul va uning dugonasi 1 soat 12 daqiqa ichida 2:6, 5:7 hisobida mag‘lub bo‘lishdi.

Musobaqa albatta kutilmagan natijalarga boy bo‘lmoqda. Turnirda birinchi raqam ostida saralangan ruminiyalik Irina Kameliya-Beguning ilk uchrashuvdagi mag‘lubiyati, qolaversa, o‘z vaqtida «Ulkan toj» musobaqalarida yaxshi natijalarni qayd etgan kanadalik Ejeni Busharlarning ilk davradayoq imkoniyatni boy berganini bunga misol qilib keltirsak bo‘ladi.

Turnir 29 sentyabrga qadar davom etadi.