Osiyo futbol konfederasiyasining rasmiy sahifasi bo‘lgan the-afc.com, Shayx Salmon bin Ibrohim al-Xalifaning Toshkentda o‘tkazilgan OFK Ijroqo‘mining yig‘ilishida aytgan so‘zlari haqida maqola e’lon qildi.
Uning so‘zlariga ko‘ra, O‘zbekiston futboli Markaziy Osiyoda eng kuchlisiga aylanmoqda va buni OFK ham e’tirof etadi. Shayx Salmon O‘zbekistonga tashrifi chog‘ida O‘zbekistonning kelgusidagi futbolni rivojlantirish chora-tadbirlari hamda xalqaro turnirlarda ishtirok etish rejalari bilan yaqindan tanishdi.
2018 yil yanvar oyida bo‘lib o‘tgan yoshlar o‘rtasidagi U-20 Osiyo chempionatidagi muvaffaqiyatdan so‘ng O‘zbekiston terma jamoasi 2019 yilda BAAda bo‘ladigan Osiyo kubogi hamda Tokio-2020 Olimpiada o‘yinlariga katta kuch bilan tayyorgarlikni boshlab yuborgan.
U O‘zbekiston milliy olimpiya qo‘mitasi Prezidenti hamda O‘zbekiston futbol assosiasiyasi 1-vise Prezidenti Umid Ahmadjonov bilan o‘zaro esdalik sovg‘alarini almashar ekan, O‘zbekistonda futbolning jadallik bilan rivojlanayotganiga qoyil qolganini, O‘zbekiston Osiyo futbolida haqiqiy kuchga aylanayotganini yoshlarning muvaffaqiyatlari hamda U-23 musobaqasidagi g‘alaba yaqqol isbotlab berganini ta’kidladi.
Terma jamoa Osiyo miqyosidagi musobaqalarda, JCH saralashlarida hamda turli o‘rtoqlik uchrashuvlarida yetarlicha tajriba to‘pladi va bu tajriba Tokio-2020, Qatarda bo‘lib o‘tadigan JCH-2022 saralash o‘yinlarida albatta asqotadi, – deydi OFK Prezidenti.
Yurtingizda ko‘plab sport turlari hamda futbolga katta sarmoyalar jalb etilmoqda va bu o‘z samarasini bermay qolmaydi deb ta’kidlaydi Shayx Salmon.
