O‘zbekiston kubogi yarim finalidan o‘rin olgan “Bunyodkor” – AGMK (1:2) uchrashuvidan so‘ng mezbonlar murabbiyi Mirjalol Qosimov matbuot anjumanida ishtirok etib, o‘z fikrlari bilan bo‘lishdi.

"Hayot davom etadi. Kimdir xato qiladi, raqib o‘sha xatodan foydalanadi. Suhrob Sultonov ko‘p vaziyatlarda bizni qutqargan. Bir futbolchini ayblay olmayman. Nachora futbol shunday. Oldinda Superligadagi o‘yinlar bor.

Osiyo chempionlar ligasi yo‘llanmasiga ega chiqish uchun oxirigacha kurashamiz. AGMK klubini finalga chiqqani bilan tabriklayman. Yigitlarga, bizni qo‘llab-quvvatlagan muxlislarga tashakkur. Hisob 0:2 bo‘lishiga qaramay oxirigacha kurashishdi.

Bugun "Bunyodkor" avvalgi o‘yinlardagidek o‘ynamadi degan fikrga qo‘shilmayman. O‘yin o‘yinga o‘xshamaydi. Boshqa tomondan AGMK ham yaxshi jamoa, infrastruktura, tarkibdagi futbolchilar...Birinchi bo‘limda qiyin o‘yin bo‘ldi. 100 foizli vaziyatlardan foydalanish kerak edi. "Lokomotiv" bilan o‘yinda ham shunday bo‘ldi.

Qayerdadir tajriba yetishmadi. Eng asosiysi tezda tiklanish kerak. Ruhan o‘zimizga kelishimiz lozim. Faoliyatimda alamli mag‘lubiyatlar ko‘p bo‘lgan. 4:0 hisobida oldinda borib yakunda yutqazganmiz ham.

Men shunday qiyin sharoitda maydonga tushib muxlislarni oxirigacha hayajonda ushlab turgan o‘z futbolchilarim bilan faxrlanaman. Shogirdlarimning sabri va irodasiga rahmat.