“Nasaf” Pepsi Superliganing 25-tur uchrashuvini o‘z maydonida Navoiyning “Qizilqum” jamoasiga qarshi o‘tkazadi. Uchrashuv 2 oktyabr seshanba kuni “Markaziy” stadionimizda bo‘lib o‘tadi va soat 20:00da boshlanadi.
O‘zaro uchrashuvlar tarixidan
Mazkur jamoalarning o‘zaro uchrashuvlari tarixiga nazar tashlasak, “Nasaf” va “Qizilqum” jamoalari hozirgacha 38 marta kuch sinashgan. Ushbu bahslarning 22 tasida jamoamizning qo‘li baland kelgan bo‘lsa, 6 uchrashuvda navoiylik futbolchilar g‘alaba qozonishgan. 10 uchrashuvda tomonlar durangga imzo chekishgan.
To‘plar nisbati bo‘yicha ham “Nasaf” ustunlik qilmoqda: 70-39.
Endi mazkur jamoalar o‘rtasidagi eng yirik hisoblar haqida to‘xtaladigan bo‘lsak, jamoamiz “Qizilqum” ustidan 7:1, 5:2 va 4:0 ko‘rinishida g‘alabaga erishgan. “Qizilqum”ning “Nasaf” ustidan eng yirik hisobdagi g‘alabasi 3:1 ko‘rinishida.
Qarshida bo‘lib o‘tgan o‘zaro uchrashuvlarga oid
Mazkur jamoalar Qarshida jami 18 marta o‘zaro bahslashgan. Ularning 14tasida jamoamiz g‘alaba qozongan, bir uchrashuvda “Qizilqum” jamoasi kichik 1:0 hisobida g‘alabaga erishgan. Bu uchrashuv 2008 yili bo‘lib o‘tgan. Qolgan 3 uchrashuvda murosa ko‘chasi tanlangan. Qarshidagi uchrashuvlarda jami darvozalarga 59 marta gol kiritilgan. Gollar nisbati bo‘yicha ham ustunlik “Nasaf” tomonida: 45-14.
Shu yilning 13 iyul kunida Qarshida o‘tgan o‘zaro uchrashuvda, jamoalar 0:0 hisobida durang o‘ynashgan.
Bo‘lajak uchrashuv jamoalarning Qarshidagi 19-uchrashuvi sifatida tarixga kiradi.
Qarshidagi so‘nggi besh uchrashuv natijasi
2018 yil. “Nasaf” - “Qizilqum” 0:0
2017 yil. “Nasaf” – “Qizilqum” 2:0
2016 yil. “Nasaf” – “Qizilqum” 2:0
2015 yil. “Nasaf” – “Qizilqum” 3:1
2014 yil. “Nasaf” – “Qizilqum” 2:0
“Qizilqum” jamoasi so‘nggi bor 2008 yili Qarshidan uch ochko bilan qaytgan. Ushbu uchrashuv 23-tur doirasida bo‘lib, 4 oktyabr kuni o‘tgan va “ma’danchi”lar kichik 1:0 hisobida zafar quchishgan.
Mazkur jamoalarning o‘rinbosarlari o‘rtasidagi uchrashuv, 1 oktyabr dushanba kuni Sputnik qo‘rg‘onidagi yoshlarimiz qarorgohida bo‘lib o‘tadi va soat 16:30da boshlanadi.
Barcha futbol ishqibozlarini ushbu uchrashuvlarga taklif etib qolamiz.
