O‘zbekiston kubogi 1/4 final bosqichi doirasidagi “Paxtakor” — “Lokomotiv” uchrashuvining 42-daqiqasida “Lokomotiv” jamoasi futbolchisi Sadriddin Abdullayev raqibi Dragan Cheranga bosh bilan zarba berib, uning maydonga yiqilishiga sababchi bo‘lgandi.
Vaziyatga yaqin turgan uchrashuv bosh hakami Ahrol Risqullayev “Lokomotiv” vakili Sadriddin Abdullayevni qizil kartochkaga munosib ko‘rib, uni maydondan chetlatgandi.
“Paxtakor” — “Lokomotiv” uchrashuvining 42-daqiqasida yuz bergan mazkur vaziyat atroflicha o‘rganib chiqildi. Natijada, Musobaqalar reglamentining intizomiy va jarimalar kodeksi 3-bo‘lim 5.45 bandining “I” qismini qo‘pol ravishda buzganligi uchun “Lokomotiv” jamoasi futbolchisi Sadriddin Abdullayev navbatdagi ikkita rasmiy uchrashuvdan chetlatildi hamda unga nisbatan 10 000 000 (o‘n million) so‘m miqdorida jarima belgilandi.
Shuningdek, o‘sha vaziyatda professional futbolchiga xos bo‘lmagan hatti-harakat bilan provakasiya boshlagani uchun “Paxtakor” a’zosi Dragan Cheran 5 000 000 (besh million) so‘m miqdorida jarimaga tortildi.
