Pro liga 28-tur uchrashuvlari doirasidan o‘rin olgan “G‘ijduvon” – “Xotira-79” uchrashuvi o‘tkazilmaydi. Bunda mezbonlarga texnik g‘alaba, mehmonlarga esa texnik mag‘lubiyat yozildi.

Chunki “Xotira-79” jamoasi safar uchrashuviga murabbiylar shtabisiz tashrif buyurdi. G‘ijduvonga Uychidan faqatgina 14 nafar futbolchigina keldi xolos. Jamoaning natijasi uchun javob beradigan murabbiy, jamoaga mas’ul – ma’mur, futbolchilar sog‘ligiga javobgar sanaluvchi klub shifokori esa noma’lum sabablarga ko‘ra o‘yinga kela olmadi. Shu sababdan uchrashuv komissari o‘yin o‘tkazilmasligini lozim topdi.

Ta’kidlash joiz, oldinroq Uychi tumanining “Xotira-79” klubiga Pro-Liga 22-turidan joy olgan “Labsa” — “Xotira-79” safar o‘yiniga ham bora olmagani sabab texnik mag‘lubiyat yozilgan edi.

Davralar oralig‘ida moliyaviy muammolarga duch kelgan mazkur klubning Pro ligada ishtirokini davom ettirishi masalasi tez kunlarda PFL komissiyasi tomonidan ko‘rib chiqiladi. 

O‘z oldiga hech qanday maqsad qo‘ya olmaydigan va faqatgina bugungi kuni bilan yashaydigan klublar bilan chempionat saviyasini ko‘tarish qiyin. Kelasi yildan boshlab bu kabi jamoalar formati o‘zgaradigan 2-liga musobaqalarida ishtirok etishi mumkin. Pro-Ligada esa Superliganing minimal talablariga javob bera oladigan klublargina qoldiriladi.