O‘zbekiston milliy terma jamoasi o‘yinlari sabab, milliy chempionatda yuzaga kelgan tanaffusdan foydalangan holda  “Qo‘qon-1912” jamoasi futbolchilariga qisqa muddatli ta’til berilgan edi.

Jamoa a’zolari bugundan Toshkent shahrida navbatdagi o‘yinlarga tayyorgarlikni boshlab yuborishdi.

Hozirgina Toshkentdagi “Mehnat” mehmonxonasining anjumanlar zalida “Qo‘qon-1912” futbol klubi rahbariyati, murabbiylar shtabi hamda jamoaning barcha futbolchilari ishtirokida yig‘ilish bo‘lib o‘tdi. Yig‘ilishni klub prezidenti Baxtiyorjon  Tolipov kirish so‘zi bilan boshlab berdilar.

“Jaomamizning so‘nggi o‘yinlardagi ko‘rsatgan natijalari bizni va muxlislarimizni mutlaqo qoniqtirmaydi. Mavsumni yaxshi boshlagan edik, maqsadimiz superliganing kuchli oltiligiga kirish edi. Shunga yarasha siz futbolchilarga sharoitlarni yaratishga qo‘limizdan kelgancha harakat qildik.

Kuchli oltilikka kirish uchun o‘z maydonimizda o‘tgan ayrim o‘yinlardagi qoniqarsiz natijalar sabab bo‘ldi. Ayniqsa oxirgi turlardagi o‘z maydonimizda o‘tkazgan “Nasaf” va “AGMK” jamoalariga qarshi o‘yinlardan men umuman qoniqmadim” – dedi jumladan Baxtiyor Adilovich.

Shuningdek bosh murabbiy No‘’mon Hasanov hamda futbolchilar Nosir  Otaqo‘ziyev, Murod Holmuhammedovlar ham so‘z olib , so‘nggi o‘yinlardagi natijalar haqiqatan ham qoniqarsiz bo‘lganligi, endi qolgan o‘yinlarda maksimal natija uchun maydonga tushishlari lozimligini ta’kidlashdi. Futbolchilarimiz muxlislarga mavsum boshida ko‘rsatgan chiroyli o‘yinlarini namoyish qilib , yil yakunida  jamoaning turnir jadvalidagi o‘rnini yaxshilashga va’da berishdi.

Shundan so‘ng klub prezidenti B Tolipov jamoaga katta tajribaga ega bo‘lgan mutaxassis, asli Qo‘qonlik bo‘lgan, Vitaliy Nikolayevich Ni yordam berishi mumkinligini, Ni Qarshining “Nasaf” jamoasida ishlab katta tajriba ortirganini aytib , u kishini “Qo‘qon-1912” futbol klubi texnik direktori etib tayinlaganini e’lon qildilar.

Vitaliy  Ni zimmasiga jamoani qiyin vaziyatdan olib chiqib ketish, kelgusi mavsum uchun seleksiya ishlari bilan shug‘ullanish, futbol akademiyasi tashkil etish hamda jamoaning barcha natijalari uchun javobgarlik vazifasi yuklatildi.

Shundan so‘ng Vitaliy Nikolayevich so‘z olib  jumladan shunday dedi.

-“Meni futbolga kirib kelishimda , futboldagi hayotimda Qo‘qon katta rol o‘ynagan. Men uchun bu shahar begona emas va jamoaning natijalarini muntazam ravishda kuzatib kelaman. “Qo‘qon-1912” jamoasi hozirgi kunda turnir jadvalida o‘ziga mos bo‘lmagan o‘rinda turibdi. Men o‘zimga berilayotgan ishonch uchun jamoa rahbariyatiga minnatdorchilik bildiraman.

Kelajakda jamoaning O‘zbekistonda o‘z o‘rniga ega bo‘lishi uchun bor kuch va imkoniyatni, to‘plagan tajribam va bilimimni sarflashga harakat qilaman. O‘ylamanki biz barchamiz bir yoqadan bosh chiqarib harakat qilsak albatta ko‘zlangan maqsadga erishamiz” – dedi Vitaliy Ni.

Biz ham jamoamiz a’zolari va muxlislarimiz nomidan Vitaliy Nikolayevichga  boshlagan ishlarida omadlar yor bo‘lishini tilab qolamiz.