Indoneziya poytaxti Jakarta shahrida III Paraosiyo o‘yinlari davom etmoqda.

Bungacha dzyudo, yengil atletika, pauerliftingchilarimizning muvaffaqiyatlari haqida xabar qilgandik. Endi esa suzuvchilarimiz terma jamoamizga ketma-ket medallar shodasini taqdim etishdi.

100 metrga erkin usulda suzish bahslarida erkaklar o‘rtasida shohsupadan bizning sportchilar o‘rin olishdi. Islam Aslanov marraga birinchi bo‘lib yetib keldi va oltin medal qo‘lga kiritishi barobarida Paraosiyo o‘yinlari rekordini ham o‘rnatdi.

Undan keyingi o‘rinlarni mos ravishda Muzaffar Tursunxo‘jayev va Dmitriy Xorlinlar egallashdi. Huddi shu yo‘nalishning ayollar o‘rtasidagi bahslarida Fotimaxon Omilovaga teng keladigan raqib topilmadi. Kumush medalga esa Shohsanamxon Toshpo‘latova ega chiqdi.

Shu tariqa, O‘zbekiston terma jamoasining Paraosiyo o‘yinlaridagi medallari soni 20taga yetdi. Ularning 12tasi oltin medal ekanligini alohida qayd etish lozim. Kumush medallar soni 5ta bo‘lsa, hamyurtlarimiz yana 3ta bronza medallariga sazovor bo‘lganlar.

Medallar jamg‘arish reytingida O‘zbekiston terma jamoasi Xitoy va Janubiy Koreyadan so‘ng uchinchi o‘rinni egallab turibdi.