O‘zbekiston U17 terma jamoasi bosh murabbiyi Otabek G‘ulomxo‘jayev Shotlandiya o‘smirlar terma jamoasiga qarshi bo‘lib o‘tgan o‘rtoqlik o‘yinidan keyin o‘z fikrlari bilan o‘rtoqlashdi.

“Agar e’tibor qilgan bo‘lsangiz, xalqaro maydonda bir necha bor ko‘rinish bergan futbolchilar o‘ziga bo‘lgan ishonchi bilan ajralib turdi. Ilk bor safarda bo‘lib turgan yigitlarda esa boshida hayajon sezildi. Nima demoqchiman, bunday raqiblarga qarshi o‘rtoqlik o‘yinlarining ko‘proq bo‘lishi faqat va faqat foydalidir. O‘sha Shotlandiya ham, boshqa termalar ham xuddi biz kabi futbol o‘ynashini, bizdan ortiq joyi yo‘qligini futbolchilar ongli ravishda tushunib olishlari kerak. Shuning uchun ham Ispaniya yig‘inini tashkil qilib bergan O‘FA rahbariyatiga o‘z minnatdorchiligimni bildiraman”, — dedi Otabek G‘ulomxo‘jayev o‘yindan keyin.

O‘zbekiston yoshlar terma jamoasining keyingi o‘yini 13 oktyabr kuni Belgiya U18 ga qarshi bo‘lib o‘tadi.