10 oktyabr, chorshanba kuni «Dinamo» markaziy stadioni anjumanlar zalida Samarqand viloyati hokimi vazifasini bajaruvchi Erkinjon Turdimov «Dinamo» professional futbol klubi rahbariyati, murabbiylar, futbolchilar, muxlislar va OAV vakillari bilan uchrashdi.
Yig‘ilishda viloyat hokimi “Dinamo” klubining joriy yilgi mavsumdagi ishtirokini tanqidiy va tahliliy tarzda baholab, viloyatning bosh jamoasi Samarqandga munosib bo‘lishi lozimligini ta’kidladi.
- “Barchamiz juda yaxshi bilamiz, Samarqand ahli futbolsevar xalq. Viloyatning qaysi bir chekkasiga bormang, futbol haqida gap ochilganida “Dinamo”ning qayd etayotgan natijasi odamlar orasida muhokama qilinayotgan bo‘ladi. Samarqandimiz bosh jamoasining joriy yilda ko‘rsatayotgan natijasi shaxsan meni viloyat futbol assosiasiyasi prezidenti sifatida qoniqtirmayapti” – deya ta’kidladi Erkinjon Oqbo‘tayevich.
Yig‘ilish davomida “Dinamo” klubi rahbarlari, murabbiylar, futbolchilar, jurnalistlar va muxlislarning takliflarini eshitgan Erkinjon Turdimov “Dinamo” klubi moddiy-texnik bazasini mustahkamlash, futbolchilar va murabbiylar uchun zarur shart-sharoit yaratish va ularni munosib rag‘batlantirishda kuzatilayotgan muammolarni bartaraf etish borasida ko‘rsatmalar berdi.
Xususan, jamoa mashg‘ulotlari uchun munosib o‘yingoh va maydon ajratish, klub qarorgohi borasida yangi taklif kiritish, “Dinamo” stadionidan foydalanish, zamonaviy avtobus xarid qilish va futbolchilarni o‘z vaqtida rag‘batlantirib borish bo‘yicha chora-tadbirlar belgilandi. Viloyat rahbari “Dinamo”ning kelgusi mavsumda Superligada ishtirok etishi uchun barcha imkoniyat yaratib berilishini, buning uchun jamoa faqat va faqat g‘alabalari bilan muxlislarni xursand etishi lozimligini aytib o‘tdi.
- “Dinamo” – mamlakatimizning eng ko‘p aholiga ega viloyati sanalmish Samarqandning bosh jamoasidir. “Dinamo” bu – Samarqandning o‘ziga xos ko‘p yillik brendi. Yodingizda bo‘lsa, bir necha yil oldin “Dinamo” nomi o‘zgartirilib, “Afrosiyob” ham, “Maroqand” ham deya nomlangandi, ammo klub o‘z tarixi va an’analari bilan “Dinamo” sifatida mashhur. “Dinamo” Samarqandga munosib bo‘lishi lozim. Hozirgi natijalar uchun murabbiy va futbolchilarni hozirdan qoralash niyatim yo‘q, sababi ularga qanday sharoit yaratilganidan bexabarman. Hozirdan “Dinamo” klubining tashkiliy va moliyaviy yo‘nalishlarini belgilab olishimiz darkor. Bundan buyon nafaqat “Dinamo”, viloyat futboli ham imkonqadar nazoratimda bo‘ladi. Bolalar futbolini ham rivojlantirishimiz kerak. Bolalar futbolidagi muammo va kamchiliklarni bartaraf etib, sharoitlarni yana bir ko‘zdan kechirish, stadion va maydonlarni yaxshilash borasida ishlar rejasini tuzishimiz shart. Bolalar va o‘smirlar futboli bu - poydevor, bunga jiddiy yondashish lozim” – dedi viloyat rahbari.
Yig‘ilish yakunida Erkinjon Turdimov futboldagi muammo va kamchiliklar, takliflar borasida klub rahbariyati va murabbiylarni jurnalistlar va muxlislar bilan doimo ochiq muloqotga kirishishlari lozimligini, Samarqand futboli rivoji uchun barcha birlashib bir yoqadan bosh chiqarib harakat qilishi shartligini ta’kidladi.
Tadbir yakunida “Dinamo” bosh murabbiyi Davron Fayziyev so‘zga chiqib, Erkinjon Turdimovga futbol jonkuyari sifatida qilinayotgan katta e’tibor uchun minnatdorchilik izhor etib, bildirilgan ishonchni oqlash uchun butun jamoa mas’uliyatni his etgan holda Superliga yo‘llanmasi uchun kurashishini ma’lum qildi va viloyat hokimiga jamoa nomidan “Dinamo”ning 49-raqamli libosini sovg‘a qildi.
“Dinamo” klubi matbuot xizmati.
